هاوژین عومه‌ر كه‌ریم 23/03/2020 126 جار خوێنراوەتەوە

شەڕێکی نابەرپرسیارانە

لە ھەڵمەتەکانی ڕووبەڕووبوونەوەی نەخۆشیی کۆرۆنا و مەترسییەکانی، ئەوانەی فەزڵی گەورەیان ھەیە و لەڕیزەکانی پێشەوەی ئەو جەنگەدان، پزیشک و کارمەندە ئەمنی و تەندروستییەکان و بەرپرسانی یەکە ئیدارییەکانن لە سەرتاسەری ھەرێمی کوردستاندا، لەگەڵ ئەوانیشدا، بەشێک لە خێرخواز و سەرمایەدار و دامودەزگا خێرخوازییەکان.

بە واتایەکی تر؛ لۆدی ھەرەگەورەی ھەڵمەتەکانی بەرگرتن و ڕووبەڕووبوونەوەی نەخۆشیی کۆرۆنا، لەسەر دامودەزگا و بەرپرسە خۆجێییەکانە، نەک دەسەڵاتی مەرکەزیی و حکومەتی ھەرێم، حکومەتی ھەرێمیش واتە حزبی حاکم و دەسەڵاتدار، کە جگە لە پێدانی ڕێنمایی و ئامۆژگاریی زارەکیی، ھیچ ھەوڵێکی جددی و کرداریی ئەوتۆی لێ نەبینراوە، مەبەستیش لە ھەوڵی کرداریی لێرەدا، بریتییە لە دۆزینەوەی چارەسەری خێرا بۆ دابەشکردنی مووچەی فەرمانبەران، بڕیاردان و تەرخانکردنی بودجەیەکی پێویست بۆ ڕووبەڕووبوونەوەی نەخۆشییەکە، دروستکردنی نەخۆشخانەی پێویست، بڕیاردانی دەرماڵەیەکی زیادە و پێویست بۆ ئەو کادرە تەندروستی و ئیداریی و ئەمنییانەی بەشێک لە ئەرکی ھەڵمەتەکەیان کەوتۆتە ئەستۆ.

سەرباری ھەموو ئەو کەمتەرخەمییانەش، کەچی بەشێک لەو حزبانەی دەسەڵات، لە ڕێگەی میدیا و سۆشیالمیدیا دابەستەکانیانەوە، شەڕی ناوچەگەریی و دەرمارگیرییانە و نابەرپرسیارانە لەگەڵ بەشێک لە دەزگا خۆجێیی و بەرپرسەکانیان دەکەن، لە پای جووڵە و چالاکی و ئەو بەرەوپێشچوونانەی لە ھەڵمەتەکەدا تۆماریان کردوون، ئەمە جگە لەو شەڕە سیاسی و حزبییەشی لە چەند ڕۆژی ڕابردوودا، لە نێوان دەزگا ئەمنییەکانی دەسەڵات ڕوویان دا.

دەسەڵات و حکومەتی ڕاشید ئەو دەسەڵات و حکومەتەن کە لە کاتی سەرھەڵدانی ھەر قەیرانێکی لەناکاو و ھاوشێوەی نەخۆشیی کۆرۆنادا، بە دوو خاڵدا دەناسرێنەوە: یەکەمیان بوونی ژێرخان و پایە و ئامادەیی تەواو بۆ ھەر ڕووداو و پێشھاتێکی لەناکاو.. دووەمیشیان ھەڵسوکەوتی بەرپرسیارانە و پێویست لە کاتی ئاسایی و نائاسایی و قەیرانەکاندا.

ئێستا ھەرێمی کوردستان لەسەر ئاستی دەسەڵات و حوکمڕانەکانی، خاوەنی کەمتەرخەمیی زۆرە سەبارەت بەو دوو خاڵەی سەرەوە، قەیرانێکی گەورە و مەترسیداری وەکو نەخۆشیی کۆرۆنا، پێویستە ببێتە وێستگە و خاڵی وەرچەرخانی گرنگ بۆ ئەم دەسەڵاتەی ھەرێم، بە ئاڕاستەی بەخۆداچوونەوە و دوورکەوتنەوە لە مامەڵە و شەڕی نابەرپرسیارانە!

لە تۆڕە کۆمەڵایەتیەکان شەیری بکە

سەرەتا