به‌هرۆز جه‌عفه‌ر 29/08/2019 433 جار خوێنراوەتەوە

كه‌رتى نه‌وتى كوردستان له‌به‌رده‌م سكاڵاكانى كۆمپانیاكان و دادگاى فیدراڵى دا

لێكه‌وته‌ ئابورى و یاسایی و نێوده‌وڵه‌تییه‌كانى گرێبه‌سته‌كانى حكومه‌تى هه‌رێم له‌گه‌ڵ كۆمپانیا جیهانیه‌كان له‌م دوو مانگه‌دا یه‌كێكه‌ له‌ قورسترین تاقیكردنه‌وه‌كانى به‌رده‌م حكومڕانى كوردى، ئێستا حكومه‌تى هه‌رێم كه‌وتۆته‌ به‌رده‌م سێ جۆر له سكاڵا:

یه‌كه‌م: سكاڵاى وه‌زاره‌تى نه‌وتى عێراق له‌سه‌ر توركیا له‌ داگاى نێوبژیوانى نێوده‌وڵه‌تى -ICA ڕوونتر له‌ ژوورى بازرگانى پاریس، ئه‌مه‌ ڕێكخراوێكه‌ بۆ یه‌كلاكردنه‌وه‌ى ناكۆكیه‌ بازرگانیه‌كان. سكاڵاكه‌ له‌ساڵى 2014 تۆماركراوه‌و بنه‌ماكه‌ى ئه‌وه‌یه‌ حكومه‌تى عێراق گرێبه‌ستى له‌گه‌ڵ توركیا هه‌یه‌ په‌یوه‌ست به‌هێڵى كه‌ركوك-جه‌یهان، كه‌چى توركیا چووه‌ هێلێكى ترى كردۆته‌وه‌ له‌گه‌ڵ هه‌رێمى كوردستان...ئه‌مه‌ش پێشێلى ئه‌و دێڵه‌یه‌ كردویانه‌. لێره‌دا ئه‌گه‌ر توركیا بدۆڕیت به‌ عێراق ئه وا هه‌رێم زیان ئه‌كات و هێڵى ووزه‌ى كوردستان نامێنێت، ئه‌گه‌ر عێراقیش بدۆڕێت ئه‌وا هه‌رێم و هێڵى ووزه‌كه‌ى ئه‌بێته‌ بارمته‌ لاى توركیا و ده‌ستوه‌ردانه‌كانى زیاتر ئه‌بێت!

دووه‌م: سكاڵاى دیناسیتى پیترۆلیوم، ئه‌مه‌ ڕاسته‌وخۆ له‌ خودى ئاشتى هه‌ورامى كراوه‌، به‌ڵام ئاشتى هه‌ورامى ئه‌توانێت به‌ یاساى ژماره‌ 22 ى ساڵى 2007 ى تایبه‌ت به‌ یاساى نه‌وت و گازى هه‌رێم به‌ پێى مادده‌ى 30 به‌رگرى له‌ خۆى بكات.

سێهه‌م: سكاڵاى دادگاى فیدراڵى عێراق له‌سه‌ر هه‌رێم، ئه‌مه‌شیان چه‌ند ساڵه‌ هه‌یه‌، به‌ڵام هه‌رێم نوێنه‌رى ئاماده‌ نه‌ ئه‌بو له‌ دادگاكه‌، بۆیه‌ پرۆسه‌كه‌ مه‌جراى قانونى خۆى وه‌رنه‌ ئه‌گرت. به‌ڵام دواى 16ى ئۆكتۆبه‌ر و ئاسایی بونه‌وه‌ى په‌یوه‌ندییه‌كه‌ هه‌رێم بڕیارى دا نوێنه‌رى ئاماده‌ بێت.

ڕه‌هه‌نده‌ جیپۆڵه‌تیكى و نێوده‌وڵه‌تییه‌كه‌ى ئه‌م پرسه‌ له‌ لایه‌نه‌ یاسایی و ئابورییه‌كه‌ى هه‌ستیارتره‌. چونكه‌ ڕه‌نگه‌ به‌ هۆى دانوستانى سیاسی پێشوه‌خته‌ى لایه‌نه‌كانه‌وه‌ چاره‌سه‌رییه‌ك ڕوبدات پێش ئه‌وه‌ى كه‌یسه‌كان ببه‌نه‌ دادگا. به‌ڵام گۆڕینى هێڵى ووزه‌ ڕاسته‌وخۆ په‌یوه‌سته‌ به‌ ئاسایشى هه‌رێمایه‌تى و هاوپه‌یمانێتیه‌كانى ناوچه‌كه‌وه‌.

لە تۆڕە کۆمەڵایەتیەکان شەیری بکە

سەرەتا