روحانی: ئیدارەی ترەمپ پەرە بە ڤایرۆسی كۆرۆنا دەدات

په‌یام

حەسەن روحانی سەركۆماری ئێران، رایگه‌یاند: لە ڕێگەی جێبەجێكردنی سزاكانی سەر وڵاتەكەمان لەم رەوشەی ئێستا، ئیدارەی ئەمریكا، پەرە بە ڤایرۆسی كۆرۆنا دەدات.

روحانی پەیامێكی ئاراستەی گەلی ئەمریكا كردووە و تیایدا ئەوەی وتووە: "تاران رووبەڕووی قورسترین سزای تیرۆری ئابووریی ئەمریكا بووەتەوە كە لە مێژوویی خۆیدا رووبەڕووی نەبووەتەوە، تەنانەت واشنتۆن ئامادە نییە دەستبەرداری سیاسیەتی فشاری توند بێت، جگە لەوەش بەدرێژەدان بە جێبەجێكردنی سزاكانی سەر تاران لەم رەوشەی ئێستا، پەرە به‌ كۆرۆنا، دەدات".

وتیشی: "واشنتۆن لەو كاتەی لە مانگی ئایاری 2018 لە رێككەوتنی ئەتۆمی كشاوەتەوە، زیاتر لە 100 سزای بەسەر ئابووری و دارایی ئێراندا سەپاندووە كە ئەوەش بە ملیارەها دۆلار زیانی بە گەلی ئێران گەیاندووە، هەروەها توانای ئێستای ئێرانی بۆ رووبەڕووبوونەوەی ڤایرۆسی كۆرۆنا كەمكردووەتەوە".

هۆشداری ئەوەشیدا كە هەر سیاسەتێك لەئێستادا بۆ ئامانجی لاوازكردنی سیستەمی پزیشكی لە ئێران پەیڕەو بكرێت، هەوڵ بدرێت داهاتی دارایی ئێران بۆ رووبەڕووبوونەوەی ڤایرۆسی كۆرۆنا سنووردار بكرێت، ئەوا دەرهاوێشتەی خراپی بۆ سەر رووبەڕووبوونەوەی ڤایرۆسەكە لە وڵاتانی دیكەش دەبێت.

تا دوێنێ‌ هەینی ژمارەی ئەو كەسانەی كە بەهۆی ڤایرۆسی كۆرۆناوە لە ئێران گیانیان لەدەستدا بەرزبوویەوە بۆ هەزار و 433 كەس و ژمارەی تووشبووانیش بە ڤایرۆسەكە گەیشتە 19 هەزار و 644 كەس.