ئالابا بە لێدوانێک دڵی هاندەرانی بەرشەلۆنە و ڕیاڵ مەدرید دڵخۆش دەکات

پەیام سپۆرت - بڕیار تەها

داڤید ئالابای نەمسایی و بەرگریکاری یانەی بایرن میونخ هەرچەندە مانەوەی دڵخۆشی خۆی لە ڕیزەکانی یانە ئەڵمانییەکە دووپات دەکاتەوە، بەڵام پەیوەندیکردن بە یانەکانی بەرشەلۆنە و ڕیاڵ مەدریدی ئیسپانیش ڕەتناکاتەوە.

 ماوەی چەند ڕۆژێکە راپۆڕتە ڕۆژنامەوانییەکان باس لە چوونی بەرگریکارەی بایرن میونخ بۆ ڕیاڵ و بەرشە دەکەن و لە بارەیەشەوە ڕۆژنامەی بێڵدی ئەڵمانی دیدارێکی لەگەڵ ئالابا ئەنجامداوە و یاریزانەکە لە وەڵامدا دەڵێت: لە یانەی بایرن میونخ هەست بە ئاسوودەی دەکەم، بەڵام دەتوانم بیر لە ڕێگای جیاواز جیاوازیش بکەمەوە، بەڵام لە ئێستادا لە یانەکەم هەست بە دوو دڵی ناکەم.

لە درێژەی قسەکانیدا بەرگریکارەکەی بایرن میونخ سەبارەت بە تاقیکردنەوەی ئەزموونێکی دیکە ئاماژەی بەوەکرد، لەوانەیە لە دوو ساڵی داهاتوودا گۆڕانکاری لە ژیانیدا ڕوو بدات و لەوانەیە بگەڕێتەوە بۆ وڵاتەکەی خۆی یان ڕوو لە ئەمریکای بکات و شارەزایی کلتورێکی نوێ ببێت.

لە کۆتایشدا ئالابا وتی: لە بایرن میونخ هەموو شتێک باشە، بەڵام دەتوانم بیر لەوە بکەمەوە لە شاری بەرشەلۆنە بژیم یان شارێکی دیکە، لە ڕاستیدا نازانم لە داهاتوودا چی ڕوو دەدات.