یاریزانێکی یۆڤانتۆس نوێکردنەوەی گرێبەستەکەی ڕەتدەکاتەوە

پەیام سپۆرت - بڕیار تەها

گۆنزالۆ هیگواینی ئەرجەنتینی ڕەتیدەکاتەوە گرێبەستەکەی لەگەڵ یانەی یۆڤانتۆس بەو جۆرە نوێ بکاتەوە کە یانەکەی پێشکەشی کردووە.

 
پێگەی کاڵچۆ مێرکاتۆی ئیتاڵی ئاشکرایکردووە، کارگێڕی یۆڤانتۆس گفتوگۆیان لەگەل نیکۆلاسی برا و بریکاری هیگواین ئەنجامداوە، لە کۆبوونەوەکەدا بەرپرسانی خانمەپیرەکە ئۆفەرێکیان پێشکەش هێرشبەرە ئەرجەنتینییەکە کردووە تا ئەوەی بۆندەکەی بۆ یەک وەرزی دیکە و تا هاوینی 2022 درێژ بکاتەوە، بەو مەرجەی مووچەی ساڵانەکەی وەک خۆی بمێنیتەوە.

بەڵام لە وەڵامدا هیگواین و بریکارەکەی ئەو ئۆفەرەی کارگێڕی یۆڤانتۆس – یان ڕەتکردۆتەوە و داوایان کردووە ئۆفەرێکی دیکە ئامادە بکەن کە بۆ ماوەیەکی زیاتر یاریزانەکە لە تۆرینۆ بهێڵێتەوە و تا ئێستاش گفتوگۆکان بە کراوەی ماونەتەوە و یۆڤانتۆس وەڵامی نەبووە.

گڕێبەستی ئێستای هیگواین لەگەڵ پاڵەوانی ئیتاڵیا هاوینی 2021  کۆتایی دێت و ساڵانەش مووچەی 7.5 ملیۆن یۆرۆ وەردەگرێت.