کۆبوونەوەی سەرۆکەکانی رووسیا و ئازەربایجان و ئەرمینیا بە ئەرێنى کۆتایی هات

پەیام 
کۆبوونەوەی سێ قۆڵی سەرۆکی رووسیا، ڤلادمیر پۆتین، سەرکۆماری ئازەربایجان، ئیلهام عەلییەڤ و سەرۆکوەزیرانی ئەرمینیا، نیکۆل پاشینیان لە شاری سۆچی رووسیا بە کۆتا هات.

دوای کۆبوونەوەکەش کە نزیکەی سێ کاتژمێری خایاند، هەر سێ سەرۆک لێدوانیان بۆ رۆژنامەنووسان دا و باسیان لەوە کرد کە کۆبوونەوەکە بەشێوەیەکی ئەرێنی بەڕێوەچووە.

لای خۆیەوە پۆتین ئەوەی ئاشکرا کرد کە هەفتەی ئایندە یاریدەدەرانی سەرۆک وەزیرانی رووسیا، ئازەربایجان و ئەرمینیا لە مۆسکۆ کۆدەبنەوە و بەردەوام دەبن لە کارەکانیان.

دەربارەی پەیوەندییەکانی نێوان ئازەربایجان و ئەرمینیاش، ئیلهام عەلییەڤ ئەوەی ئاشکرا کرد کە لە ئێستادا ساڵێک بەسەر راگەیەندراوەکەی هەرسێ وڵاتدا تێپەڕیوە کە بووە هۆی کۆتایی هێنان بە جەنگی نێوان ئەرمینیا و ئازەربایجان، لە ماوەی ئەمساڵەشدا بەرەوپێشچوونی ئەرێنی زۆر روویانداوە.
بەهەمان شێوە سەرۆک وەزیرانی ئەرمینیا، نیکۆل پاشینیان باسی لەوە کرد کە کۆبوونەوەیەکی بنیاتنەرانەیان ئەنجامداوە و بەئاشکرا دەربارەی هەموو بابەتە گرنگەکانی ناو رۆژەڤ، گفتوگۆیان کردووە.