کۆنگرەیەکی نێودەوڵەتیی بۆ گێڕانەوەی پارە بەتاڵانبراوەکانی عێراق بەڕێوەدەچێت

په‌یام

سبەی چوارشەممە، کۆنگرەیەکی نێودەوڵەتیی لە بەغدا پایتەختی عێراق بەڕێوەدەچێت بە ئامانجی گێرانەوەی ئەو پارانەی کە بە بەتاڵان براونەتە دەرەوە.
دەستەی دەستپاکی لە عێراق لە راگەیەندراوەکە ئاماژەی بەوەداوە، کۆنگرەکە بەچاودێریی سەرۆکوەزیرانی عێراق، مستەفا کازمی و بەشداریی ئەمینداری گشتیی کۆمکاری عەرەبی، ئەحمەد ئەبو غێت و ژمارەیەک لە وەزیرانی دادیی وڵاتان، یاساناسان و دەستەکانی بنبڕکردنی گەندەڵیی بەڕێوەدەچێت کە ماوەی دوو رۆژ دەخایەنێت و ھاتووە:
"لە کۆنگرەکەدا، ژمارەیەک پانێڵ پێشکەش دەکرێن کە تیایاندا تیشک دەخرێتە سەر گرنگترین ئەو ئاستەنگانەی کە بەرەوڕووی دەستەکانی چاودێری نیشتمانیی لە پرسی گیڕانەوەی پارە بە بەتاڵانابراوەکان بووەتەوە".
دەستەی ناوبراو راشیگەیاندووە "لە میانی کۆنگرەکەدا، هەوڵدەدرێت رێگا چارەیەکی گونجاو بە ئامانجی گێرانەوەی ئەو پارانەی کە بە بەتاڵان براونەتە دەرەوە، بدۆرزێتەوە".
پێشتر ئەندامی ئیئتلافی رێککەوتننامەی نەتەوە یەکگرتووەکان بۆ بنبڕکردنی گەندەڵی و سەرۆکی تۆڕی نەھرەین بۆ پاڵپشتیکردن لە دەستپاکی و شەفافییەت، محەمەد رەحیم روبێعی راگەیاندبوو کە لە رۆژانی ١٥ و ١٦ی ئەم مانگە کۆنگرەیەکی نێودەوڵەتیی بە چاودێریی حکوومەتی عێراق، نوێنەرایەتی وەزارەتی داد، ناوەندی عەرەبی بۆ لێکۆڵینەوە یاسایی و دادوەریییەکان و ئەنجوومەنی وەزیرانی دادیی عەرەبی لە کۆمکاری عەرەبی بەڕێوەدەچێت.
محەمەد رەحیم روبێعی ئاشکراشیکردبوو کە ئامانج لە بەستنی کۆنگرەکە، ھاریکاریی عەرەبی و چڕکردنەوەی ھەوڵەکانی کۆمکاری عەرەبییە بە ئامانجی بنبڕکردنی گەندەڵی و گێرانەوەی پارە بە بەتاڵانبراوەکانی عێراق.
عێراق دوای رووخاندنی رژێمی پێشوو لە ساڵی ٢٠٠٣دا، بەھۆی گەندەڵی و ئەو پارانەیش کە بەتاڵان براونەتەوە دەرەوە، زیانی زۆری کردووە.