25/03/2020
122 جار خوێنراوەتەوە
"بەهۆی گەمارۆكانی قەوارەی ئیسڕائیل، كه‌رتی غه‌ززه ناتوانێت پێداویستی بۆ بەرەنگاربوونەوەی كۆڕۆنا دەستەبەر بكات"
په‌یام
قەوارەی ئیسڕائیل بە بەربەستدانان لەبەردەم هەوڵەكانی بەرەنگاربوونەوەی پەتای ڤایرۆسی كۆڕۆنا لە كەرتی غەززەی فەڵەستین تۆمەتبار دەكرێت.
وەزارەتی تەندروستیی كەرتی غەززە ڕایگەیاند: ''بەهۆی ئەو گەمارۆیەی ساڵانێكە قەوارەی ئیسڕائیل بەسەر ناوچەكەدا سەپاندوویەتی، ناتوانرێت پێداویستی پزیشكیی پێویست بۆ بەرەنگاربوونەوەی ڤایرۆسی كۆڕۆنا دەستەبەر بكرێت".
(ئەشرەف قودرا) وتەبێژی وەزارەتی تەندروستیی فەڵەستین ئاماژەی بەو كێشانە كرد كە بەهۆی گەمارۆی 13 ساڵەی قەوارەی ئیسڕائیل بۆ سەر كەرتی غەززە لە بەرەنگاربوونەوەی ڤایرۆسی كۆڕۆنادا، ڕووبەڕووی بوونەتەوە.
(قودرا) وتی: لەم ڕۆژانەدا كە بەرەنگاری ڤایرۆسی كۆڕۆنا دەبینەوە، پێداویستیی تاقیگەكانیان سنووردارن‌و لەسەدا 39ی دەرمانە سەرەكییەكان‌و لەسەدا 23ی كەلوپەلی پزیشكیی و لەسەدا 60ی ستۆكی خوێن لە تاقیگەكاندا كەمیان هەیە.
وتەبێژی وەزارەتی تەندروستیی فەڵەستین وتیشی: قەوارەی ئیسڕائیل بەرپرسیارە لە ژیانی فەڵەستینییەكان، لەبەرئەوەی بەشێوەیەكی بەرنامە بۆ داڕێژراو ئەو میكانیزمانە لاواز دەكات كە خزمەتگوزاری پێشكەش دەكەن، بەوەیش غەززە لە بارەی بەرەنگاربوونەوەی ڤایرۆسی كۆرۆنا، بە دووڕیانێكی مەترسیداردا دەبات.
لە تۆڕە کۆمەڵایەتیەکان شەیری بکە