لە سەرتاسەری جیهاندا 15 هەزار و 491 كەس به‌هۆی كۆرۆناوه‌ گیانیان لەدەست داوە

په‌یام

لەسەر ئاستی جیهان، ژمارەی ئەو كەسانەی بەهۆی پەتای ڤایرۆسی كۆڕۆنای نوێوە گیانیان لەدەست داوە بۆ زیاتر لە 15 هەزار بەرز بووەوە.

ماڵپەڕی (وۆڵد میتیر) بڵاوی كردەوە: ژمارەی ئەو كەسانەی تا ئێستا بەهۆی ئەو ڤایرۆسەوە لە سەرتاسەری جیهان گیانیان لەدەست داوە بۆ 15 هەزار و 491 كەس بەرز بووەتەوە.

ماڵپەڕەكە بە پشتبەستن بە زانیاری نوێكراوەی حاڵەتەكانی تووشبوون‌و گیانلەدەستدانی ڤایرۆسی كۆڕۆنا لە جیهاندا، ڕایگەیاند: ئەو وڵاتەی زۆرترین كەس تیایدا بە ڤایرۆسەكە گیانی لەدەست داوە ئیتاڵیایە كە پێنج هەزار و 476 حاڵەتە. دوای ئیتاڵیا، دووەم وڵات لەسەر ئاستی قوربانیی (چین)ـە كە سەرچاوەی سەرهەڵدانی ڤایرۆسەكەیە ‌و تائێستا سێ هەزار و 270 كەس بەهۆی ڤایرۆسەكەوە گیانیان لەدەست داوە.

لە درێژەی زانیارییەكاندا هاتووە: "ئیسپانیا بە تۆماركردنی دوو هەزار و 182 گیانلەدەستدان، پلەی سێیەمی گرتووە‌و ئێرانیش لە پلەی چوارەمدایە و هەزار و 812 كەس بە ڤایرۆسەكە گیانیان لەدەست داوە.