عێراق.. ئەمڕۆ 11 حاڵەتی نوێی كۆرۆنا تۆمار كراوە

په‌یام

لە عێراق، ئەمڕۆ 123 پشكنینی پەتای ڤایرۆسی كۆڕۆنا كراوە، لەو ژمارەیە 11 حاڵەتی نوێی پەتاكە تۆمار كراوە. 
لە ڕاگەیەندراوێكدا، وەزارەتی تەندروستی عێراق ئاشكرای كرد: ئەمڕۆ تاقیگەكانیان پشكنینی پزیشكییان بۆ 123 حاڵەتی گۆماناویی بە هەڵگری ڤایرۆسی كۆڕۆنا كردووە، لەو ژمارەیەش 11 حاڵەتی نوێی تووشبوون، تۆمار كراوە.
بەپێی زانیارییەكان، ئەو 11 حاڵەتە بەسەر چوار حاڵەتی بەغدا، دووانی كەڕبەلا و یەك حاڵەت بۆ هەریەك لە پارێزگاكانی نەجەف، بەسڕە، دیوانییە، موسەننا، واست دا دابەش بووە.
وەزارەتی تەندروستیی عێراق ڕایشیگەیاند كە خۆشبەختانە لە 24 سەعاتی ڕابردوودا هیچ حاڵەتێكی مردن بە پەتای ڤایرۆسی كۆڕۆنا تۆمار نەكراوە.
لە دوای بڵاوبوونەوەی پەتای ڤایرۆسی كۆڕۆنا لە عێراق تائێستا ژمارەی تووشبووان گەیشتووەتە 177 حاڵەت و 12 كەسیش گیانیان لەدەست داوە 49 كەسی دیكەیش چاك بوونەتەوە.