پێش 1 هەفتە
75 جار خوێنراوەتەوە
فراكسیۆنی كۆمه‌ڵ: پێویستە دەوڵەتی عێراق داوای لێبوردن لە گەلی کورد و هەڵەبجەییەکان بکات
په‌یام
بۆ یادی 32 ساڵه‌ی
كیمیایی بارانی هه‌ڵه‌بجه‌ی شه‌هید، فراكسۆنی كۆمه‌ڵی ئیسلامی له په‌رله‌مانی
كوردستان، به‌یاننامه‌یه‌كی بڵاو كرده‌وه و ڕایگه‌یاند، پێویستە دەوڵەتی عێراق
داوای لێبوردن لە گەلی کورد و هەڵەبجەییەکان بکاتەوە و بە قەرەبووکردنەوەی کەسوکاری
شەهیدان، بەشێک لە برین و ئازارەکانیان کەمبکاتەوە .
ده‌قی به‌یاننامه‌كه
بەناوی خوای بەخشندەی
میهرەبان
هاونیشتمانیانی
ئازیز
کەسوکاری شەهیدانی
کیمیاییبارانی هەڵەبجە
٣٢ ساڵ بەسەر کۆمەڵکوژی گەلەکەمان لەلایەن
ڕژێمی بەعسی لەناوچوەوە تێپەڕدەبێت، بەڵام هێشتا برینەکانی گەلی ئێمە و بەتایبەتیش
هەڵەبجەییەکان ساڕێژ نەبووە و ئەوانەی میراتگری ئەم تاوانە خەتەرناکەن کەمتەرخەم و
خەمساردن لە ئەستۆگرتنی تاوانەکە و قەرەبووکردنەوەی قوربانیان و ساڕێژکردنی برینەکانیان .
بۆیە پێویستە دەوڵەتی
عێراق داوای لێبوردن لە گەلی کورد و هەڵەبجەییەکان بکاتەوە و بە قەرەبووکردنەوەی کەسوکاری
شەهیدان، بەشێک لە برین و ئازارەکانیان کەمبکاتەوە .
هەروەک حکومەتی
هەرێمی کوردستانیش نەیتوانیوە خزمەتی شارەکە و دانیشتوانەکەی بکات و سەرەڕای بڕیاری
بە پارێزگابوونی شارەکە، هێشتا بەدەست پشتگوێخران و ململانێی حزبییەوە دەناڵێنێت و
ئەم شارە ئازیز و شەهیدە لە پەراوێزی ئاوڕلێدانەوە و خزمەتکردن و پڕۆژە خزمەتگوزارییەکاندایە .
لەم ساڵیادە خەمناکەدا
ئێمە لە فراکسیۆنی کۆمەڵ وێڕای ئەوەی ڕایدەگەیەنین کە هەموو کوردستان و کۆمەڵگەی نێودەوڵەتی
قەرزداری ئەم شارە شەهیدەن، بەرپرسیارێتی خزمەتکردنی شارەکە و خەڵکەکەی دەخەینە ئەستۆی
هەردوو حکومەتی هەرێم و ناوەند.
له خوای گه‌وره‌ش
داواكارین هه‌موو لایه‌ك ساغ و سه‌لامه‌ت و سه‌رفراز بكات.
فراکسیۆنی کۆمەڵ
لە پەرلەمانی
کوردستان
١٦/٣/٢٠٢٠
لە تۆڕە کۆمەڵایەتیەکان شەیری بکە