ئاژانسی میهری ئێران هێرش دەكاتەسەر دەسەڵاتی بارزانییەكان له‌ هه‌رێم

په‌یام

ئاژانسی میهر، كە یەكێكە لە میدیا فەرمییەكانی ئێران، لە وتارێكدا، كە لە بەشی كوردی ماڵپەڕەكەیدا بڵاوكراوەتەوە، نێچیرڤان بارزانی سەرۆكی هەرێم و مەسرور بارزانی سەرۆكی حكومەت بەوە تۆمەتبار دەكات، كە سیاسەتێكی هەڵە بەڕێوەدەبەن و بە كەم ئەزموون ناویان دەبات، بەوەی پەندیان وەرنەگرتووە و متمانەیان بە ئەمریكا هەیە.

باسی له‌وه‌شكردووه‌: "راوێژكارە ئەمریكی و ئیسرائیلییەكان بە ئەنقەست زانیاریی پێچەوانە و دوور لە راستییان بە مەسعود بارزانی سەرۆكی ئەوكاتی هەرێمی كوردستان داوە، تا بە دڵنیاییەكی لێبڕاوانەوە ریفراندۆم بكات، لەكاتێكدا پیلانی ئەمریكا ئەوە بوو ئەو هەموو پێگە سیاسی و هەژموونەی كورد دوای شەڕی داعش لە ئاستی عێراق، ناوچەكە و جیهان بەدەستیهێنابوو، بكەوێتە بەر شاڵاوی رق و قینی وڵاتانی ناوچەكە و دەوڵەتی عێراق، تا كوردستانی عێراق بۆ هەمیشە لە بندەستی و ژێر چەپۆكی ئەمریكادا بێت، چونكە ئەمریكا پێویستی بە هەرێمی كوردستانە لەم ناوچەیەدا".

میدیا فەرمییەكەی ئێران دووبارە هەڕەشەكەی ئێرانیشی بەبیرهێناوەتەوە، كە هۆشداریی دابووە ئەو وڵات و ناوچانەی دەبنە شوێنی مانەوەی سەربازانی ئەمریكا، بەڵام لە بەرانبەردا هەریەك لە مەسرور بارزانی و نێچیرڤان بارزانی جەخت لەوە دەكەنەوە، بۆ پاراستنی هەرێم لە مەترسیی تیرۆر، پێویستە ئەمریكا لە عێراق و هەرێمی كوردستاندا بمێنێتەوە.

راشیگه‌یاندووه‌: "سیاسەتوانانی گەنجی هەرێمی كوردستان بێ ئەوەی بیر لە هاوسنووریی ئێران و هەرێم بكەنەوە و لە هەستیاری بەرژەوەندییە ئەمنی و ئابووری و سنوورییەكان تێبگەن، یان بێ ئەوەی گوێ بدەنە باڵادەستبوونی ڕەوت و لایەنە دژە ئەمریكاییەكان لە عێراق، ناوبەناو داوای مانەوەی ئەمریكا لە باكوری عێراقدا دەكەن".