کۆنتی بەرانبەر بەرشەلۆنە داوایەکی قورس لە یاریزانەکانی دەکات

پەیام سپۆرت - بڕیار تەها

ئانتۆنیۆ کۆنتی ڕاهێنەری یانەی ئینتەرمیلان داوا لە یاریزانەکانی دەکات بۆ ڕووبەڕووبوونەوەی یانەی بەرشەلۆنە بەو پەڕی ئازایەتی و چاونەترسییەوە یاری بکەن، تا ئەوەی گەیشتن بە قۆناغی داهاتوو مسۆگەر بکەن.

 
لەو کۆنگرە ڕۆژنامەوانییەی بۆ یاری یانەکەی بەرانبەر بەرشەلۆنە بۆی سازکرا بوو، کۆنتی وتی: لەو کاتەوەی تیروپشکی قۆناغی کۆمەڵەکان ڕاکێشراوە دەمانزانی کە ئەرکی یانەکەمان قورسە و کۆمەڵەکەمان ئاسان نییە، بۆیە داوا لە یاریزانەکان دەکەم بەو پەڕی چاونەترسی و ئازایەتییەوە ڕووبەڕووی یانەی بەرشەلۆنە ببنەوە، چونکە یارییەکی سبەینێ بۆ ئێمە زۆر گرنگە و چارەنووسمان یەکلایدەکاتەوە.

لە درێژەی قسەکانیدا ڕاهێنەرەکەی نێرازۆری ئاماژەی بەوەکرد کە یانەی بەرشەلۆنە یەکێکە لە یانە زۆر بەهێزەکانی جیهان و 22 یاریزانی ئاست بەرز لەو یانەیەدا یاری دەکەن، کۆنتی ئەوەشی خستەڕوو کە یانە کەتەلۆنییەکە لە نێوان ئەو 4 بۆ 5 یانەیەدایە کە سەرەتایی وەرزەدا بیر لە بەدەستهێنانی سەرجەم نازناوەکان دەکەنەوە.

لە بەشێکی دیکەی قسەکانیدا کۆنتی ئەوەی نەشاردەوە کە یانەکەیان لە ژێر فشاردایە، بەڵام بە پێویستی زانی کە دەبێت بەو پلانەی خۆیان یاری بکەن کە ماوەیەکە کاری لەسەردەکەن.

لە کۆتاییدا کۆنتی وتی: نزیکەی دوو مانگ بەر لە ئێستا لە ناو کامپ نو زۆر ئازایانە ڕووبەڕووی بەرشەۆنە بووینەوە، بەڵام لە کۆتاییدا شکستمان هێنا، بەڵام ئێستا هەموو شتێک گۆڕاوە و یاریزانە پێکراوەکانی بەرشەلۆنە گەڕاونەتەوە بۆ یاریگاکان و ئەرکی ئێمە قورستر دەکەن.