02/07/2019
3201 جار خوێنراوەتەوە
ئاگاداری حەبی ئازارشکێن بن
نوســینی د.زانا دزەیی
پسپۆڕی ھەناو
حەبە ئازارشکێنەکان (مسکنات) بە پڕفرۆشتریین چارەسەرە پزیشکییەکان دادەنرێن و زۆرتریین بەکاربەریان ھەیە، ڕۆژانە نزیکەی لە ٪٣٥-٤٠ چارەسەرە پزیشکییەکان لە حەبی ئازارشکێن پێکھاتوون.
حەبە ئازار شکێنەکان چەند گرووپێکن، بەڵام ئەوەی لێرە دەمەوێ ئاماژەی پێ بکەم گرووپی حەبەکانی (دەرمانە نا ستیرۆیدە دژەھەوکەرەکان)ە، کە لە زمانی پزیشکیی بە (NSAID) ناو دەبرێن.
دیارتریین نموونەی ئەو حەبانە: ئەسپیرین، دیکلۆفیناک (ڤۆلتارین)، پڕۆفین، ناپرۆکسین، مۆبیک، ئیندۆسید، پیرۆکزیکام و ...ھتد.
بۆ ئاگادار بین لە بەکارھێنانی؟!
وەڵامەکەی لەبەر ماک و لێکەوتە سلبییەکانی ئەو حەبانەیە، کە خۆی دەگرێتەوە لە:
-برین (قوڕحە) و ھەوکردنی مەعیدە و دوانزە گرێ، بە یەکێک لە ھۆکارە سەرەکییەکانی قوڕحەی مەعیدە و دوانزە گرێ دادەنرێن، بە تایبەتی ئەگەر بە شێوەیەکی بەردەوام و ھەڕەمەکیی و بێ ڕێنمایی پزیشک بەکاربھێنرێن.
-کاریگەریی لاوەکیی و سلبیی لەسەر گورچیلەکان و ھۆکاری سست بوونی گورچیلەکانە بە تایبەتی لە کەسانی بە تەمەن و ئەوانەی کێشەی دڵ و زەخت و ڕەقبوونی خوێنبەرەکانیان ھەیە.
-بەرزبوونەوەی کاتیی فشاری خوێن، بە تایبەت لەوانەی کە بە تەمەنن.
-گەڕاندنەوەی خوێ و ئاوی زیاد بۆ لەش بە تایبەت لەوانەی کە کێشەی پەککەوتنی درێژخایەنی دڵیان ھەیە.
-تەسک کردنەوەی بۆڕیچکەی ھەناسە لە سییەکان بە تایبەت لەوانەی کە ڕەبۆ یان ھەستییاری درێژخایەنی سییەکانیان ھەیە.
ھاوڵاتی بەڕێز...
بۆ پاراستنی تەندروستی خۆت و کەس و کارت، ھەر کاتێک پێویستت بە حەبی ئازار شکێنی ئەم گرووپە دەرمانە ھەبوو، پێویستە لە ژێر ڕێنمایی پزیشکی پسپۆڕ بەکاری بھێنیت.
لە تۆڕە کۆمەڵایەتیەکان شەیری بکە