ئەحمەد شەرع بۆ سەردانی بەغداد داوای گرەنتیی لە ئەمریكا كردووە

پەیام 

میدیاكانی عێراق ئاشكرای دەكەن، ئەحمەد شەرع بۆ سەردانی بەغداد داوای گرەنتیی ئەمریكا دەكات.

شەفەق نیوز لە زاری سەرچاوەیەكی حكومییەوە بڵاوی كردووەتەوە، حكومەتی عێراق گرەنتیی زۆری داوە بە ئەحمەد شەرع، سەرۆككۆماری سووریا بۆ ئەوەی بەشداری لە لوتكەی عەرەبی بكات لە بەغداد بەڵام ئیدارەی سووریا وای دەبینێت ئەو گرەنتیانە بەس نیین.
سەرچاوەكە دەڵێت: سووریا داوای كردووە ئەمریكا گرەنتی بدات و سەردانەكە لەژێر پارێزگاریی كۆمپانیایەكی ئەمنیی ئەمریكادا بەڕێوە بچێت.

ڕاشیگەیاندووە، قەتەڕ كە نێوەندگیری نێوان سووریا و عێراقە و دیداری محەمەد شیاع سوودانی و ئەحمەد شەرعی ڕێكخست، لەگەڵ ئەوەیە كە شەرع سەردانی عێراق بكات بەڵام كۆمپانیای ئەمنیی نیە بۆ ئەوەی پارێزگاریی لێ بكات.

سەرچاوە عێراقییەكە ڕاشیگەیاندووە: سووریا ترسی هەیە لەوەی لەلایەن گرووپە چەكدارەكانی عێراقەوە ئەحمەد شەرع بەئامانج بگیرێت، ئێرانیش تا ئێستا بەرانبەر سەردانەكە بێدەنگیی هەڵبژاردووە.

ئەمە لەكاتێكدایە عێراق بانگهێشتی ئەحمەد شەرعی كردووە بۆ ئەوەی لە لوتكەی عەرەبی لە بەغداد ئامادە بێت كە بڕیارە ناوەڕاستی ئەم مانگە بەڕێوەبچێت. ئەمەش لەناوخۆی بەشێك لە هێزە شیعەكان و گروپە چەكدارەكانی شیعەدا ناڕەزایی دروست كردووە.