لاوتارۆ مارتینێز لە بارەی یاری بەرشەلۆنە هۆشداری دەداتە یاریزانەکانی هاوڕێی

پەیام سپۆڕت - مەڕوان تاڵیب

لاوتارۆ مارتینێزی کاپتنی ئینتەرمیلان هۆشداری دەدات و ڕایگەیاند، زۆر باش هێزی هێرشبەری بەرشەلۆنە دەناسن.

 لە کۆنگرەی ڕۆژنامەوانی تایبەت بەو یارییە، لاوتارۆ ئاماژەی بەوەدا، تیپەکەیان لە دۆخێکی باشدایە و کلیلی سەرکەوتنی هەر یانەیەک یەکڕیزییە و بۆ یارییەکە تەواو ئامادەن و لە ژووری جلگۆڕین چەند ئامۆژگارییەکیان بە یەکدی وتووە.

کاپتنەکەی نیراتزۆری باس لەوەش دەکات، زۆر باش هێزی هێرشبەری و توانای گۆڵکردنی بەرشەلۆنە دەناسن و پێویستە هەمووان لە ڕووی بەرگرییەوە کاری زۆر باش بکەن، چونکە خۆیان تاکە تیپن لەم وەرزە لە بەرگری زۆر ناوازە بوون و کەمترین گۆڵیان لێکراوە.

مارتینێز دەشڵێت: لە سێ ساڵی ڕابردوو دووجار گەیشتوونەتە قۆناغی نیوەی کۆتایی و خەونی هاندەرانمان ئەوەیە دووبارە بگەینەوە یاریی کۆتایی.

لە کۆتایدا سەبارەت بە بەراوردکردنی لامین یەماڵ بە مێسی، لاوتارۆ وتی: بۆ من لیۆ ژمارە یەکە و باشترینی مێژووە و هەرواش دەمێنێتەوە، بەڵام یەماڵیش یاریزانێکی گرنگە و هەمووان دەشزانن هێشتا لاوە و نازناوی گرنگی بەدەست هێناوە.