سەرۆكی ئەنجومەنی باڵای فەتوا: نزای نیشتیمانی ئەگەر مەبەست پڕۆژەی بەناو ئایینی ئیبراهیمی بێت ئەوا كوفرە

پەیام 

سەرۆكی ئەنجومەنی باڵای فتوا لە هەرێمی كوردستان ڕوونكردنەوەیەك لەسەر نزای نیشتمانیی لە كوردستان بڵاو دەكاتەوە و ڕایدەگەیەنێت: بە مەرجێك دروستە، نزاكاران ئەهلی تەوحید و یەكتاپەرستی بن.

لە ڕوونكردنەوەكەدا كە لەلایەن پڕۆفیسۆر دكتۆر شێخ حەسەن موفتی سەرۆكی ئەنجومەنی باڵای فتوا بڵاو كراوەتەوە دەڵێ: نزای نیشتیمانی ئەگەر مەبەست پڕۆژەی بەناو ئایینی ئیبراهیمی بێت كە غەرب برەوی پێدەدات، ئەوا نەك حەرامە، بەڵكو كوفرە و موجیبی غەزەبی پەروەردگارە، چونكە ئایینی حەق لای خودا تەنها ئیسلامە.

سەرۆكی ئەنجوومەنی باڵای فەتوا ئاماژە بەوەش دەكات، "تەنها نزاكردنێك بێت پێكەوە، ئەوا ڕەنگە مەجالێكی تێدا بێت، چونكە تۆ لە ڕووی شەرعەوە ناتوانێت بە كەس بڵێیت نزا مەكە، ئەمەش بە مەرجێك نزاكاران تێكڕایان لە ئەهلی تەوحید و یەكتاپەرستی بن!".
سەرۆكی ئەنجومەنی باڵای فەتوا ئاشكرای دەكات "لە ڕووی شەرعەوە دروست نییە لە خاكی ئیسلامدا برەو بە ئەهلی شیرك و عەقیدەی موشریكان و كافران بدرێت، یان مۆڵگە و پەناگە و پەرستگە و مەعبەدیان بۆ دروست بكرێت".
جەختیش دەكاتەوە، كە وێناكردنی هەر بیروباوەڕێك وەك بیروباوەڕی ئیسلام، یان ئیسلام و غەیری ئیسلام وەك یەك وێنا بكرێن ئەوا دیسان كوفرە و پێچەوانەی عەقیدەی ئیسلامە بە كۆی ڕای زانایانی ئیسلام.
لە كۆتاییشدا پڕۆفیسۆر دكتۆر شێخ حەسەن موفتی ڕایگەیاندووە: نەتیجەی هەر تەنازولێك بۆ گاور و جولەكە سەرگەردانی و خەجاڵەتی دونیا و قیامەتی بەدوادا دێت.