ڕافینیا: بەڵێ لە سعودیەوە گرێبەستێکی گەورەم پێشکەش کراوە

پەیام سپۆڕت - مەڕوان تاڵیب

ڕافینیای بەڕازیلی و هێرشبەری یانەی بەرشەلۆنە نایشارێتەوە لە لایەن یانەکانی سعودیەوە گرێبەستی پێشکەش کراوە.

 بەپێی دوایین هەواڵەکان، یانەی هیلال بۆ ماوەی چوار ساڵ 200 ملیۆن یۆرۆی وەک مووچە پێشکەشی ڕافینیا کردووە، جگە لە 114 ملیۆن یۆرۆی دیکە بۆ بەرشەلۆنە.

لەسەر ئەو هەواڵە ڕافینیا هاتە دەنگ و ئاشکرای کرد، بەڵێ گرێبەستەکە ڕاستە و کەسێک لە سعودیەوە هەواڵی ئۆفەرەکەی پێگەیاندووە و زۆر گەورە بووە، با ڕاستگۆ بێت لەگەڵتان ئەگەر وەرزی ڕابردوو پێشکەشی بکرایە بێگومان ڕازی دەبوو، چونکە ئەوکاتە لە ڕووی دەروونییەوە زۆر خراپ بووە.

ئەو ئەستێرەی بلاوگرانا دەشڵێت: ئەوەی بڵێت بەو ئۆفەرە رازی نابم، درۆ دەکات، چونکە ئەستەمە بیری لێنەکەیتەوە، چونکە ئەمجۆرە پارانە ژیانت دەگۆڕن، بەڵام لە ئێستادا گوێ بە پارە نادەم و خواستی زۆرم لە ئەورووپا و لەگەڵ هەڵبژاردەی نیشتیمانی هەیە.