لەبری دەستگیركردنی نەتەنیاهوو، هەنگاریا پێشوازیی لێ كرد و لە دادگای تاوانی نێودەوڵەتیش كشایەوە

پەیام

وەك سەرپێچییەك لە بڕیاری دەستگركردنی لەلایەن دادگای تاوانی نێودەوڵەتی، هەنگاریا پێشوازیی لە نەتەنیاهوو كرد و لە دادگاكەیش كشایەوە.

ئەمڕۆ بنیامین نەتەنیاهوو سەرۆكوەزیرانی قەوارەی زایۆنی بە سەردانێكی فەرمی و لەسەر بانگهیشتی ڤیكتۆر ئۆربان سەرۆكوەزیرانی هەنگاریا گەیشتە بۆدابستی پایتەختی وڵاتەكە و بڕیاریشە سەردانەكەی چەند ڕۆژێك بخایەنێت.

ئەمەیش دوای ئەوەی ڤیكتۆر ئۆربان بەڵێنی پێدابوو بڕیاری دادگای تاوانی نێودەوڵەتی كە بنكەكەی لە لاهای هۆڵەندایە بۆ بڕیاری دەستگیركردنی پشتگوێ بخات، كە بەهۆی تێوەگلانی لە تاوانی جەنگ بۆی دەركرابوو.
ئۆربان دادگاكەیشی بە دەستێوەردانی بەردەوام بۆ مەبەستی سیاسی تۆمەتبار كرد.

لای خۆیەوە (كریستۆڤ زالای بوبرۆفیتسكی)، وەزیری بەرگریی هەنگاریا لە پێگەی خۆی لە تۆڕی ئێكس نووسینێكی بڵاو كردووەتەوە و بەخێرهاتنی نەتەنیاهووی بۆ پایتەختی وڵاتەكەیان كردووە.
هاوكات لەگەڵ سەردانەكەی نەتەنیاهوو بۆ هەنگاریا كە لە لیستی داواكراوانی دادگای لاهایدایە، حكومەتی وڵاتەكە كشانەوەی خۆی لە ئەندامێتی دادگاكە ڕاگەیاند.

لە 21 تشرینی دووەمی ساڵی ڕابردوو دادگای تاوانی نێودەوڵەتیی لاهای، لە چوارچێوەی جەنگی سەر غەززە و بەهۆی تێوەگلانیان لە تاوانی دژە مرۆیی و جەنگ، بڕیارێكی دەستگیركردنی بۆ هەریەك لە بنیامین نەتەنیاهوو سەرۆكوەزیران و یواف گالانت وەزیری پیشووی بەرگریی قەوارەكە دەركرد.