وەزیری نەوتی عێراق: ئەم هەفتەیە هەناردەی نەوتی هەرێم دەستپێدەكاتەوە

پەیام 

حیان عەبدولغەنی وەزیری نەوتی عێراق ڕایدەگەیەنێت تا دوو ڕۆژی دیكە ڕێكارەكانی هەناردەكردنەوەی نەوت ئامادە دەبێت و لەم هەفتەیەدا هەناردەی نەوتی هەرێم دەست پێ دەكاتەوە.

لە میانەی كۆنگرەیەكی ڕۆژنامەوانیدا عەبدولغەنی ڕاشیگەیاند، دەستپێكردنەوەی هەناردەی نەوتی هەرێمی كوردستان لە ڕێگەی بەندەری جەیهانی توركیەوە كاریگەریی نابێت لەسەر پابەندیی عێراق بە بڕیارەكانی ئۆپیك پڵەس و بەغداد پابەندە بە ڕێككەوتنەكان و كەمكردنەوەی بەرهەمهێنان و پلانی قەرەبووكردنەوەوە.

ڕاشیگەیاند: بڕی هەناردەی نەوت لە ژێر كۆنترۆڵی وەزارەتی نەوتی عێراقدا دەبێت.

حیان عەبدولغەنی ئاماژەی بەوەش داوە، چاوەڕێی ڕەزامەندیی توركیان بۆ دەستپێكردنەوەی هەناردەی نەوت و هیواخوازە لە دوو ڕۆژدا تەواوی ڕیكارەكان تەواو بن و ئامادەبن. ڕاشیگەیاند: لەم هەفتەیەدا نەوتی هەرێمی كوردستان بەرەو بازاڕەكانی جیهان پەمپ دەكرێتەوە.