13/02/2025
597 جار خوێنراوەتەوە
ژمارەیەك مامۆستا لە سنووری پەروەردەی چەمچەماڵ لە مووچەی مانگی یەك بێبەش كران
پەیام
ژمارەیەك مامۆستا لە سنووری پەروەردەی چەمچەماڵ بەهۆی نەناردنی
ناوەكانیانەوە بۆ بەغداد، لە وەرگرتنی مووچەی مانگی یەك بێبەش كران.
بەپێی ئەو زانیارییانەی كە دەست پەیام كەوتووە، 32 مامۆستا
لە سنووری بەڕێوەبەرایەتی پەروەردەی چەمچەماڵ كە ژمارەیەكیان بەم دواییانە خانەنشین
بوون، مووچەی مانگی یەكیان بۆ خەرج نەكراوە و 16 مامۆستای دیكەیش بە لێبڕینەوە موچەكانیان
وەرگرتووە.
سەرەڕای ئەوەی ئەو مامۆستایانە وترابوو كە هەڵەكە لە بەغدادەوەیە،
بەڵام بە وتەی نوێنەری ئەو مامۆستایانە سۆران عومەر سەرۆكی فراكسیۆنی كۆمەڵی دادگەری
بەدواداچوونی بۆ كێشەكە كردەوە و پێی ڕاگەیاندوون هیچ هەڵەیەك لە دۆسیەكەدا لە لایەن
بەغدادەوە ئەنجام نەدراوە.
دوای بەدواداچوونەكانی پەیامیش دەركەوت، كە ناوی ئەو مامۆستایانە
بەهۆی نەبوونی كات و شارەزانەبوونی تەواوەتی لە ئامادەكردنی لیستەكەدا، لەلایەن بەڕێوەبەرایەتیی
گشتیی پەروەردەی چەمچەماڵەوە بۆ بەغداد ڕەوانە نەكراون و هەر ئەوەیش هۆكاری زیانمەندبوونی
مامۆستاكان بووە.
ئەوە لەكاتێكدایە ئەو مامۆستایانە هاوشێوەی سەرجەم مووچەخۆرانی
هەرێمی كوردستان مووچەی مانگی 12ی ساڵی ڕابردوویان وەرنەگرتووە، هاوكات مەترسیشان
هەیە لە مانگی دوودا گرفتەكەیان چارەسەر نەكرێت و هاوشێوەی مانگی یەك مووچەیان پێ
نەدرێت.
لە تۆڕە کۆمەڵایەتیەکان شەیری بکە