پێش 2 هەفتە 113 جار خوێنراوەتەوە

مەلەی نێو ئەستێركی باغەكەی ئەبوزەر

مەلەی نێو ئەستێركی باغەكەی ئەبوزەر

ره‌وشت محه‌مه‌د
یادی تۆ خەیاڵ و كاغەزم دەداتە بەرباران
تەڕ ئەبین بە بۆنی ڕەیحانەی هاوەڵان.

یادت خۆم و شیعرم
دەخاتە ئەستێركی باغەكەی "ئەبو زەڕ"
باغە پڕ گلەییەكەی هەم سەوز و هەم تەڕتەڕ.

یادت ئەی یادگاری خودایا
سەبری بێ‌ ئارامم دەباتەوە لای
دار خورمای تووڕەیی "عومەر" و
زمانم پڕ دەكا لە سەنای شیرینی
قامەتی كەشخەی ئەو.

یادت وەك باغەوان
خەیاڵم پڕ دەكا لە قەزوان
دەمباتەوە لای شانە هەنگوینی
تەوقەكانی "عوسمان".

بەیادت دەچمەوە بۆ ئەوێ‌، بۆ "مەككە"
كۆڵانە تۆزاوی و ماندووەكان
خوایە ئەو هەموو مرواری ئازارە
خوایە ئەم هەموو گوڵزارە، چی ئەكەن
خوایە ئەم هەموو ڕەیحانەی دوعایە دەبینم
ئەم هەموو دڵۆپە خوێنانە
هەر دەڵێی سورەیای نێو كۆشكی شاهانە.

بە یادت دەچمەوە سەر كێوی "حیڕا"
هەر كانی "ئایەت"ە و لرفەی دێ‌
سەرزەمین ئەشۆرێ‌
كارێزی "سورەت"ە بەو كێوە وشكەوە
سەرلێوی دەریاكان تەڕ دەكا.

ڕێگای "سەور"
بە سەحرای تۆزاوی خەیاڵی منەوە
پڕە لە دارگوێزی "لاتحزن"
سەوز و سور گوڵاڵەی جێگە پێی
"صدیق"ی هاوڕێتن

یادت ئەمباتەوە سەروەختی ئێواری لای "بەدر"
سنەوبەرێ‌ دەبینم، باڵا سەوز، ڕەشتاڵە
لە چاویا هەزاران چۆلەكەی ئەشكەنجە ئەبینم
بە دەستی "ئومەییە" باڵبەسراو
لە چاویا هەزاران چۆلەكە دەبینم
دەم بە جریوەجریوی "ئەحەدون..."
وەختێ‌ كە سنەوبەری ڕەشتاڵە
دەچێتە بەرزایی و بانگ ئەدا
لە دەنگ و ئاوازیا چۆلەكە و ئازادی دێنە دەر
لە دەنگ و ئاوازیا بوخورد و سنەوبەر دێنە دەر
لە دەنگیا فڕین دێ‌ دەداتە دەشت و دەر.

بە یادت دەچمەوە لای "عەلی" لای كەماڵ
درەختی شۆخ و شەنگ
شۆرەبی ڕواوی سەر بەرماڵ
لە ژێر سێبەری سەوزیا ڕائەكشێم
من سەبری سەرنجم ئەپچڕێ‌
ئەو هەروا بە پێوە
لەبەردەم، جوانیی خوادا ڕواوە
بێ‌ جوڵە، مەگەر جارجارە، با
شۆڕەبی سەربەرماڵ بهێنێ تە سەما
بێ‌ ئۆقرە لەبەردەم
ئاگری جوانیی "عەلی"دا وەستاوم
چاوەڕێم شۆڕەبی بێتەوە و
داستانی "خەیبەر"م بۆ بگێڕێتەوە
لەولاوە دەنگێك وەك دەنگی "تار" دەبیسم
لەولاوە دەبینم "زولفەقار"
دەمی وەك: دەمی پاییزە هەنارە و پێم دەڵێ‌:
غەریبە چاوەڕێی چی دەكەی؟
شۆڕەبی نوێژی ئەبەدی ڕواوە
چاوەڕێی چی دەكەی؟.

یادت دەمباتەوە لای "ئوحود"
ئەو دڵەی بە پێوە وەستاوە
بە دوو دەست لە كانی
جوانیی پێغەمبەر نۆش ئەكا
ئەو دڵەی لە هەركوێ‌
لە سنگی ئازیزا لێ ئەدا.

لە تۆڕە کۆمەڵایەتیەکان شەیری بکە

  • پێش 1 هەفتە

    چی ده‌رباره‌ی زێوه‌ری شاعیر ده‌زانی؟

  • پێش 2 هەفتە

    مەلەی نێو ئەستێركی باغەكەی ئەبوزەر

  • 07/10/2019

    ئەزمە

  • 06/10/2019

    یەکێک لە سروودە بەناوبانگەکانی هونەری ئیسلامی ژێرنوسی كوردی بۆ زیادکرا

  • 02/09/2019

    شووشه‌ سڕی نیشتیمان

  • 20/08/2019

    توركیا وشه‌ی كوردستان له‌ رۆمانێكی پاولۆ كۆیلۆ ده‌سڕێته‌وه‌

  • 06/08/2019

    رۆمانی ده‌ریاس و لاشه‌كان سه‌ریاس چۆن هاته‌وه‌و بۆ ونبوو؟

  • 29/07/2019

    رۆژێک ھەر دێم و پەیامێک دەھێنم

سەرەتا