ترەمپ: بۆ كۆتاییهێنان بە جەنگ، ئۆكرانیا ئامادەی گفتوگۆیە لەگەڵ ڕووسیا

پەیام 

دۆناڵد ترەمپ ڕایدەگەیەنێت: سەرۆكی ئۆكرانیا بۆ كۆتاییهێنان بە جەنگ ئامادەیە گفتوگۆ لەگەڵ ڕووسیا بكات. 

دۆناڵد ترەمپ سەرۆكی ئەمریكا ڕایگەیاند: بۆ كۆتاییهێنان بە جەنگ سەرۆكی ئۆكرانیا ئامادەی گفتوگۆكردنە بۆ گەیشتن بە ڕێككەوتن، وتیشی: پێویست بوو زیلینسكی نەیهێشتایە ململانێكان لە ئۆكرانیا دەستپێبكات. 

ترەمپ ڕایشیگەیاند: زیلینسكی فریشتە نییە و دەبوو ڕێگەی بە هەڵگیرسانی ئەو جەنگە نەدایە و لە ئێستادا ئامادەی گفتوگۆیە بۆ گەیشتن بە ڕێككەوتن، دوای ئەوەش ژمارەیەكی زۆر لە سەربازی لە دەستداوە ئنجا ئارەزووی ڕاگرتنی جەنگ دەكات و ڕووسیاش بە هەمان شێوەیە. 

ترەمپ جەختیشی كردەوە، پێدەچێت شی جین بینگ سەرۆكی چین كاریگەری لەسەر جەنگی نێوان ڕووسیا و ئۆكرانیا هەبێت، ئاماژەی بەوەشدا، چین هەژموونی زۆری لە ڕووسیا هەیە، بەوەی كە من گوێبیستی بووم وا دەزانم پێویستە ڕووسیا ڕێككەوتنێك بكات، پوتین ئارەزووی بینینی من دەكات و لە نزیكترین كاتدا چاومان بەیەكدی دەكەوێت. 

ئەمەش لەكاتێكدایە ڕۆژی پێنجشەممە دیمیتری بیسكۆڤ وتەبێژی كۆشكی سەرۆكایەتیی ڕووسیا جەختی لە ئامادەیی وڵاتەكەی بۆ دانوستانێك لەسەر جەنگی ئۆكرانیا كردەوە كە هاوسەنگی و ڕێزگرتنی بەرانبەری تێدا پارێزراو بێت.