دادگای تاوانی نێودەوڵەتی دادوەری لێكۆڵینەوەی لە دۆسیەی كۆمەڵكوژی لەسەر كار لادا

پەیام

دادگای تاوانی نێودەوڵەتی بڕیاری دا ئەو دادوەرە لەسەر كار لا بدات كە نزیك بوو لەوەی بڕیاری دەستگیر كردن بۆ نەتەنیاهوو دەربكات.

دادگاكە ڕایگەیاندووە: ئەو دادوەرە ڕۆمانییەی لێكۆڵینەوە لە دۆسیەی كۆمەڵكوژی لە كەرتی غەززە دەكرد بڕیاری گۆڕینی دراوە.

هەرچەندە دادگای تاوانی نێودەوڵەتی باسی لەوە كردووە دادوەرەكە بەهۆكاری تەندروستی لەسەر كار لادراوە، بەڵام بەشێك لە میدیاكان ئاماژەیان بەوە داوە، پێدەچێت پەیوەندیی بە فشارەكانی قەوارەی زایۆنییەوە هەبێت بەو هۆیەی ئەو دادوەرە نزیك بوو لەوەی بە تۆمەتی ئەنجامدانی كۆمەڵكوژیی خەڵكی سیڤیل لە غەززە بڕیاری دەستگیركردنی بنیامین نەتەنیاهوو، سەرۆكوەزیرانی ئەو قەوارەیە بدات.

پێشتر دادگای تاوانی نێودەوڵەتی فەرمانی دەستگیركردنی بۆ یواف گالانت، وەزیری بەرگریی زایۆنی دەركردبوو و داوای دەركردنی هەمان فەرمانیشی بۆ نەتەنیاهوو كردبوو.. كەریم خانیش كە داواكاری گشتیی دادگاكەیە ڕایگەیاندبوو: نەتەنیاهوو و گالانت تۆمەتی كۆمەڵكوژی و برسیكردنی خەڵك و ڕێگەگرتن لە گەیشتنی هاوكارییەكان و بەئامانجگرتنی مەدەنییەكان بەئەنقەست لەكاتی جەنگ، دراوەتە پاڵیان.