23/09/2024
377 جار خوێنراوەتەوە
هەولێر.. "نابێت بانگەشەی هەڵبژاردن بە كاروانی زۆری ئۆتۆمبێل و لە شەقامە گشتییەكان بكرێت"
پەیام
لیژنەی ئەمنی پارێزگای هەولێر 13 رێنمایی بۆ بەڕێوەچونی بانگەشەی هەڵبژاردنی پەرلەمانی كوردستان بڵاوكردەوە و بەگوێرەی رێنماییەكانیش، نابێت بەهیچ شێوەیەك بانگەشەی هەڵبژاردن بە كاروانی زۆری ئۆتۆمبێل لە شەقامە گشتییەكان بكرێت، بۆ ئەنجامدانی هەر گردبوونەوەیەكی جەماوەری بە مەبەستی بانگەشەی هەڵبژاردن، دەبێت ڕەزامەندی لیژنەی ئەمنی وەربگیرێت.
لیژنەی ئەمنی پارێزگای هەولێر لەڕاگەیەندراوێكدا بڵاویكردەوە، "هەروەها هەر بەربژێرێك پابەند نەبێت بە ڕێنماییەكان، پۆستەر و بانگهێشتەكەی لەلایەن تیمەكانی شارەوانی لادەدرێت و كاردانەوەی یاسایی لەگەڵ دەكرێت".
بەپێی ڕێنماییەكانی پارێزگاری هەولێر، نابێت بەهیچ شێوەیەك لە چوار ڕێییان و ترافیك لایتەكان وێنە و پۆستەر و دروشمی كاندیدان لێبدرێت و بەهیچ شێوەیەك نابێت وێنە و پۆستەری كاندیدان لە فەرمانگە حكومیەكان، نەخۆشخانە، قوتابخانەكان، بدرێت.
هەروەها بەپێی ڕێنماییەكان لە پارێزگاری هەولێر، بەهیچ شێوەیەك نابێت پۆستەر و دروشمەكانی تایبەت بە بانگەشەی هەڵبژاردن لەسەر دیوار و شوێنە گشتییەكان وەك (مزگەوت، كلێساكان، شوێنە پیرۆزە ئاینیەكان و شوێنە كەلتووری و مێژوییەكان) هەڵبواسرێت.
لە تۆڕە کۆمەڵایەتیەکان شەیری بکە