مامۆستایانی گرێبەست: تاوەكو مووچەی مانگی 6 تا 9 وەرنەگرین، دەوام ناكەین

پەیام

نوێنەرانی مامۆستایانی گرێبەست لە سنووری 17 پەروەردە خۆیان لە نوێنەرانیان بێبەری دەكەن و ڕایدەگەیەنن: دەوام ناكەن تاكو مووچەی مانگی شەش تا نۆ وەرنەگرن.

لە ڕوونكردنەوەیەكدا نوێنەرانی مامۆستایانی گرێبەستی سنووری 17 بەڕێوەبەرایەتیی پەروەردە ئاماژەیان بەوە داوە، پاش دووساڵ لە بەسەرچوونی ماوەی یاسایی ئەم حكومەتە و لە سەروەختی نزیكبوونەوەی بانگەشەی هەڵبژاردن؛ دەسەڵات لە ڕێی چەند كەسێكەوە (كە خۆیان وەك نوێنەر و دەمڕاستی وانەبێژان لەقەڵەمداوە) فەرمانی بەگرێبەستبوونمانی وەك مژدەیەكی گەورە پێ ڕاگەیاندووین.

ئەو نوێنەرانەی مامۆستایانی گرێبەست باسیان لەوە كردووە، بەگرێبەستكردنیان جیاوازییەكی ئەوتۆی نییە لەگەڵ وانەبێژیدا لە ڕووی ئیمتیازات و مووچەوە و دەڵێن: بە گومانەوە لەو جوڵە و لێدوانە قەبەكەرانەی چەند كەسێك دەڕوانین، كە شەو و ڕۆژیان داوەتە دەم یەك بۆ ماكیاجكردنی ڕووی دزێوی دەسەڵاتێكی تاڵانكاری بێهەست و ستەمكار.

نوێنەرانی مامۆستایانی گرێبەست ڕاشیدەگەیەنن: بۆیە پێمان شەرم و نەنگییە چەند كەسێك بە نوێنەری خۆمان بزانین، كە بیریان چووبێتەوە یان لەبیری خۆیان بردووەتەوە! كە دەسەڵات سەبەتەیەك خورمای لێبردووین و شەكرێكی لە مێرووبەجێماوی بە منەت و چاوشۆڕكردن پێداوین.

ئەو مامۆستایانە ڕوویان كردووەتە دەسەڵات و دەڵێن: خەیاڵتان خاوە، بە فەرمانی گرێبەستكردنمان، بتانەوێ درز بخەنە نێوان ئێمە و مامۆستایانی بەهەڵوێستی هەمیشەییەوە؛ كردنەوەی دەوام بەندە بە پێدانی مووچەی مانگەكانی 6 - 7- 8 - 9 و جێبەجێكردنی داواكارییەكانی مامۆستایانی هەمیشەیی.