كوه‌یت.. شۆفێرێكی تاكسی له‌سه‌ر نوسینی ئایه‌تێكی قورئان ده‌ستگیرده‌كرێت

په‌یام

وەزارەتی ناوخۆی كوەیت شۆفێرێكی تاكسی دەستگیردەكات پاش ئەوەی وێنەی ئۆتۆمبیلەكەی لە تۆڕەكۆمەڵایەتییەكاندا بڵاوكرایەوە و لە پشتەوەی ئۆتۆمبیلەكەی ئایەتێكی قورئانی بە مەبەستی هاندانی خەڵك بۆ سەركەوتنی ئۆتۆمبیلەكەی نوسیبوو.
شۆفێرەكە بە مەبەستی بانگێشتكردن و هاندانی خەڵك بۆ سەركەوتنی ئۆتۆمبیلەكەی ئایەتێكی سوورەتی (هود) "یا بنی اركب معنا ولا تكن مع الكافرین"نوسیبوو.
پاش بڵاوبوونەوەی وێنەی ئۆتۆمبیلەكەش وەزارەتی ناوخۆی كوەیت هەستا بە دەستگیركردنی شۆفێرەكە و دەستبەسەرداگرتنی ئۆتۆمبیلەكەش بە بیانووی پێشێلكردنی یاسا و ڕێنماییەكانی هاتووچۆ.
هەروەها وەزارەتی ناوخۆی كوەیت راشیگەیاندووە، ڕێكاری پێویست بەرامبەر بە كۆمپانیاكە و شۆفێرەكەش دەگیردرێتە بەر.
"یا بنی اركب معنا ولا تكن مع الكافرین" واتا؛ ئەی كوڕە چكۆلەكەم وەرە و لەگەڵمان سەركەوە و خۆت لە ئێمە مەبوێرە و، لەكافر و بێباوەڕان مەبە بە ئاینی خوا. (تەفسیری رامان)
ئەوەش وتەی پێغەمبەر (نوح) ـە علیە السلام، پاش جوڵەكردنی كەشتییەكە و بردنی بەناو شەپۆلەكانی دەریادا بانگ لە كوڕەكەی دەكات بۆ ئەوەی سەركەوێت لەگەڵیان، كە لە بێباوەڕان بوو.