بریکارەکەی دێمبڵی.. چیتر هەڕەشە لە بەرشەلۆنە قبوڵ ناکەین

پەیام سپۆڕت - مەروان تالب

بریکارەکەی عۆسمان دێمبڵی هێرشبەری بەرشەلۆنە سەبارەت بەو فشارانەی لە یاریزانەکە دەکرێت هاتە دەنگ و ڕایگەیاند هەڕەشە قبوڵ ناکەین.

موسا سیسۆکۆی بریکارەکەی عۆسمان دێمبڵی لە لێدوانێکیدا ڕایگەیاند، لەوانەیە ئێمە لە ڕوانگەی بەرشەلۆنەوە داواکاری زۆرمان هەبێت، بەڵام دێمبڵیش مافی خۆیەتی داواکاری هەبێت، مانەوەی عۆسمان لە بەرشەلۆنە تەنیا بۆ پارە نییە، بەڵگەش ئەوەیە یاریزانەکە پێشنیاری باشتری هەبووە، بەڵام مانەوەی لە بەرشەلۆنە هەڵبژاردووە.

‌موسا سەبارەت بەو هەڕەشانەی کە بەرشەلۆنە لە دێمبڵی کردووە گوایە لەناو هاندەرانەوە دای دەنێن و سزای دەدەن وتی: ئەوە تەنیا کارتێکی فشارە و کار لە کەسانی وەک ئێمە ناکات و هەڕەشەش قبوڵ ناکەین، ئەگەر هەڕەش بەردەوام بێت ئەوا من لێرەم بۆ ئەوەی بەرگری لە یاریزانەکەم بکەم.

‌لە کۆتایدا بریکارەکەی دێمبڵی ڕایگەیاند، داواکارییەکانی ئێمە تەنیا دارای نییە، بەرشەلۆنەش هەر کاتێک بیەوێت ئێمە ئامادەین دانیشتن و گفتوگۆیان لەگەڵدا بکەین.