یۆڤانتۆس سەرجەم گفتوگۆکانی لەگەڵ دیبالا وەستاند

پەیام سپۆرت - مەروان تالب

یانەی یۆڤانتۆسی ئیتاڵی سەرجەم گفتوگۆکانی لەگەڵ پاولۆ دیبالای ئەرجەنتینی وەستاند و ئامادە نییە ئۆفەری دیکەی پێشکەش بکات.

تۆڕی  سکای سپۆرت هەواڵێکی گرنگی لە بارەی دۆخی نێوان یۆڤانتۆس و دیبالا بڵاوکردۆتەوە و ڕایگەیاندووە، یۆڤانتۆس گفتوگۆکانی لەگەڵ دیبالا دواخستووە بۆ مانگی داهاتوو یان مانگی سێ، پاش ئەوەی لەم چەند هەفتەیەدا گفتوگۆکانی نێوان هەردوولا  تێک چوو.

ئەو تۆڕە ئەوەشی ئاشکرا کردووە، بەرپرسانی یۆڤانتۆس وازیان لە ڕێککەوتنەکەیان لەگەڵ دیبالا هێنا و پێشنیاری فەرمییان کشاندەوە و ئۆفەرێکی کەمتریان پێشکەشی یاریزانەکە کردووە، دوای ئەوەی ئەو یاریزانە ئۆفەرە فەڕمییەکەی ڕەت کردۆتەوە.

سکای ئەوەشی ڕونکردۆتەوە، یۆڤانتۆس بەنیازە جارێکی دیکە ئۆفەری پێشووی پێ نەداتەوە، تەنانەت ئەگەر ناچار بێت بە خۆڕایی یاریزانەکە لە دەست بدات.

لە کۆتایدا سەرچاوەکە ڕایگەیاند، لە ئێستادا دیبالا چێژ لە بەرژەوەندیەکانی لەگەڵ تۆتنهام و بەرشەلۆنە و ئەتلەتیکۆ مەدرید و ئینتەرمیلان وەردەگرێت.