06/12/2021
292 جار خوێنراوەتەوە
مەڵبەندی کەرکووکی کۆمەڵ: ئیدانەی ئەو کارە ترسنۆکانانە دەکەین کە دەکرێنەسەر پێشمەرگەو گوندە کوردنشینەکان
پەیام
مەڵبەندی کەرکووکی کۆمەڵ لە بەیاننامەیەکدا ئیدانەی سەرجەم ئەو کارە ترسنۆکانانە دەکات کە دەکرێنەسەر گوندە کورد نشینەکانی ناوچەکە و هێزەکانی پێشمەرگە.
بەپێویستیشى دەزانێت هەرچی زووە حکومەتی هەرێم بەهانای ئەو گوندانەوە بچێت و بەرگریان لێ بکات.
ئەمەش دەقى بەیاننامەکەیە:-
بەیاننامەی مەڵبەندی کەرکووکی کۆمەڵی دادگەریی کوردستان
ئێمە لە مەڵبەندی کەرکوکی کۆمەڵی دادگەریی کوردستان ئیدانەی سەرجەم ئەو کارە ترسنۆکانانە دەکەین کە لەم دووایەدا ڕوویانداوە بۆ سەر گوندە کورد نشینەکانی ناوچەکە و هێزەکانی پێشمەرگە ، بەداخەوە بەهۆی ئەو بۆشاییە ئەمنیەی کە دروستبووە لەدوای ڕووداوەکانی 16 ئۆکتۆبەر و نەگەڕانەوەی پێشمەرگە و نەبوونی هەماهەنگی لەنێوان هێزەکانی حکومەتی عێراقی فیدراڵ، لەو ناوچانە و دروستبوونی بۆشایی ئەمنی کەماوەیەکە شەوانە گوندەکانی سنوری کەرکوک بەگشتی و کوردنشینەکان بە تایبەتی ئەکەونە بەر هێرش و پەلاماری گروپە چەکدارەکانی داعش و بەوهۆیەوە بەشێک لەو گوندە کوردنشینانە چۆڵکراون و مەترسی تەواو لەسەر ژیانیان دروستبووە.
*. ئێمە وەکو کۆمەڵی دادگەریی داوا دەکەین.
*. پەلە بکرێت لە جێبەجێکردنی ڕێکەوتنامەی نێوان هێزەکانی پێشمەرگە لەگەڵ سوپای عێراق لەو ناوچەیە بۆ ئەوەی دڵنیایی بدات بە دانیشتوانی ئەو گوندانە.
ڕاگەیاندنی مەڵبەندی کەرکووک کۆمەڵی دادگەریی کوردستان
لە تۆڕە کۆمەڵایەتیەکان شەیری بکە