وته‌بێژی كۆمه‌ڵ به‌ بۆنه‌ی یادی 237 ساڵه‌ی دامه‌زراندنی سلێمانی په‌یامێكی بڵاوكرده‌وه‌

پەیام

وته‌بێژی كۆمه‌ڵی دادگه‌ری به‌ بۆنه‌ی یادی 237 ساڵه‌ی دامه‌زراندنی شاری سلێمانی په‌یامێكی بڵاو كرده‌وه‌ كه‌ ئه‌مه‌ ده‌قه‌كه‌یه‌تی:

شاری سلێمانی 237 ساڵه‌ له‌ دڵ و ویژدانی نه‌وه‌ له‌دوای نه‌وه‌دا پیرۆزیی وه‌رده‌گرێت و هێزی خه‌بات و ژیاندۆستی پایه‌دارتر ده‌بێت، هه‌میشه‌ نه‌وه‌كانی ئه‌م شاره‌ بڵندڕاگرتنی شكۆی شاریان له‌گه‌ڵ خه‌مه‌كاندا له‌ كۆڵ ناوه‌.

له‌مڕۆدا كه‌ یادی بونیادنان و هه‌ڵهاتنی خۆری ژیان له‌م شاره‌ ده‌كه‌ینه‌وه‌، جه‌خت له‌و بیره‌وه‌ریه‌ ده‌كه‌ینه‌وه‌ و پیرۆزباییش له‌ هه‌موو كوردان به‌گشتی و نه‌وه‌كانی ئه‌م نیشتیمانه‌ دێرینه‌ به‌تایبه‌تی ده‌كه‌ین.

به‌خه‌مه‌وه‌ین كه‌ ده‌بینین له‌م ئانوساته‌ خۆشی به‌خشه‌دا بۆ شاری سلێمانی، نه‌وه‌ و لاوه‌كانی ئه‌م نیشتیمانه‌ هاوڕێ له‌گه‌ڵ پارچه‌كانی دیكه‌ی ئه‌م هه‌رێمه‌ شار به‌جێ دێڵن و خه‌می ژیانیان له‌م شاره‌دا لێ نیشتوه‌، به‌داخه‌وه‌ین و ناتوانین خۆمانی لێ بێ خه‌به‌ر كه‌ین و باسی نه‌كه‌ین كه‌ ئه‌م شاره‌ چه‌ندین قه‌یران ڕووی تێ كردوه‌ و سه‌ختیی ژیان تیایدا به‌رۆكی هه‌مووانی گرتووه‌، ساتێ خه‌می ته‌ندروستی و بێ ده‌رمانی یه‌خه‌ی ده‌گرێ و ناو به‌ناو له‌ناكاو ژیانی خه‌ڵكه‌كه‌ پڕده‌كه‌ن له‌ ناسه‌قامگیری ئه‌منی و سیاسی و ئابوری.

ژیان له‌م شاره‌دا بووه‌ته‌ ڕۆحێك هه‌ر كه‌س و گروپێك له‌پێناو به‌رژه‌وه‌ندی خۆی و مانه‌وه‌ی ده‌یكاته‌ قوربانی، گوێ له‌ هاوار و سه‌دای برینه‌كانی ناگرێ.

خه‌ڵكی ئه‌م شاره‌ له‌مڕۆدا له‌تاو حه‌سره‌تی ژانی قه‌یرانه‌ یه‌ك له‌دوای یه‌كه‌كانی كه‌ بۆی دروست ده‌كرێ بیری به‌لای یادی چه‌ندین ساڵه‌ی بونیادیدا نه‌ماوه‌ و هه‌رده‌م چاوه‌ڕوانه‌ خۆری ئارامی سیاسی و كۆمه‌ڵایه‌تی و ئابووری تیا هه‌ڵبێته‌وه‌ و نه‌وه‌كانی له‌گه‌ڵ ئه‌م نیشتمانه‌دا ئاشت ببنه‌وه‌ و چیدیكه‌ نه‌بێته‌وه‌ قوربانی به‌رژه‌وه‌ندی تاك و گروپ وحزب.

وته‌بێژی كۆمه‌ڵی دادگه‌ریی كوردستان.
14/11/2021