فەڕمی.. میلان دوورکەوتنەوەی یاریزانێکی بۆ 3 مانگ ڕاگەیاند و یاریزانێکیشی گواستەوە ڕیزەکانی

پەیام سپۆڕت

یانەی ئەیسی میلانی ئیتاڵی دوورکەوتنەوەی مایک ماگنیانی فەڕەنسی و گۆڵچی یانەکەی بۆ ماوەی نزیکەی سێ مانگ لە یاریگاکان ڕاگەیاند و ڕاستەوخۆش گواستنەوەی ئانتۆنیۆ میرانتی گۆڵچی پێشووی یانەی ڕۆمای بۆ ڕیزەکانی ئاشکرا کرد.

 ماگنیانی گۆڵچی لە یاریی یانەکەی بەرانبەر لیڤەرپووڵ لە یەکەمین یاری چامپیۆنسلیگ لە ساتی بەرپەرچدانەوەی لێدانێکی سزای محەمەد سەڵاح دووچاری ئازار دەبێتە لە ئەنیشکی قۆڵی چەپیدا، دوای ماوەیەک چارەسەری پزیشکی بەڵام ئازەرەکەی تەشەنەی سەندووە و ناچار بەپێی ڕێنماییە پزیشکەکان بە سەرپەرشتی دکترۆر لۆرێس پیجولی نەشتەگەرییەکی سەرکەوتووی بۆ ئەنجام دراوە.
بەپێی بڵاوکراوەکەی یانە ئیتاڵییەکە، ماگنیان نزیکەی 10 هەفتە واتا نزیکەی سێ مانگ لە یاریگاکان دووردەکەوێتەوە و تا قۆناغی دووەمی خولی ئیتاڵی ناتوانێت بگەڕێتەوە یاریگاکان.

دوا بەدوای ئەم نەشتەرگەرییەش یانەی ئەیسی میلان ڕاستەوخۆ گواستنەوەی ئانتۆنیۆ میرانتی گۆڵچی تەمەن 38 ساڵ بۆ ڕیزەکانی ڕاگەیاند، ئەمە لە کاتێکدایە کە یانە جگە لە پێکانی ماگنیانی گۆڵچی سەرەکی پێکانی گۆڵچی سێیەمیشی هەبوو.

میرانتی وەرزی ڕابردوو گۆڵچی یانەی ڕۆمای ئیتاڵیا بوو، بەڵام هاوینی ئەمساڵ گرێبەستەکەی کۆتایی هات و بێ یانە مابووەوە، ئەمەش وایکرد گرێبەستکردن لەگەڵی ئاسان بێت و دوای تێپەڕاندنی پشکنینە پزیشکییەکان وەک گرێبەستێکی نوێ لە ماڵپەری تایبەت بە خۆی یانەی ئەیسی میلان میرانتی ناساند.