حەماس ئیدانەی دابينكردنى مليارێک دۆلار لەلايەن ئەمريكاوە بۆ بەهێزکردنى سیستەمى بەرگريى ئيسرائيل دەکات

پەیام

بزووتنەوەی حەماس، بڕیاری ئەنجوومەنی نوێنەرانی ئەمریکا لەسەر دابینکردنی بڕی یەک مليار دۆلار بۆ بەھێزکردنی سستەمی بەرگریی ئاسمانیی ئیسرائیل "قوببەی ئاسنین"ى، ئیدانە کرد.

عەبدولەتیف قانو وتەبێژی حەماس، لە راگەیەندراوێکدا، ئاماژەی بەوە کرد ئەو بریارەی كە ئەنجوومەنی نوێنەرانی ئەمریکا دەریکردووە، بەردەوام بە لایەنگیری ئیسرائیلی داگیرکار دەدات و بەڵگەیە لەسەر ھاوبەش بوون لەگەڵ ئیسرائیلی دوژمنى گەلى فەڵەستین.

قانو، ئەوەشی راگەیاند سستەمی بەرگریی ئاسمانی و ھێزی گەورەی سەربازیی، ئاسایشی بۆ ئيسرائيل لەسەر خاکی فەڵەستین دابین ناکات و ئەوەشی دووپات کردەوە کە ئەو پاڵپشتییەی ئەمریکا، ئیسرائیل لە گورزەکانی بەرەنگاربوونەوەی فەڵەستین ناپارێزێت.

وتەبێژی حەماس، عەبدولەتیف قانو، داوای لە ئیدارەی فەڵەستینیش کرد متمانە بە ئیدارەی ئەمریکا نەکەن و لە بەرامبەر ئەم لایەنگیرییەیان ھەڵوێستێک دەربرن.