مارکا چارەنووسی هازارد بۆ وەرزی داهاتوو ئاشکرا دەکات

پەیام سپۆڕت

ئیدین هازاردی بەلجیکی نایەوێت ڕیزەکانی یانەی ڕیاڵ مەدریدی ئیسپانی جێبهێڵێت و بە پەرۆشەوەیە بۆ ئەوەی لە ژێر سەرپەرشتی کارلۆ ئانچلۆتی کار بکات.

هازارد لە هاوینی 2019 بە نزیکەی 110 ملیۆن یۆرۆ لە یانەی چێڵسی لەندەنییەوە پەیوەندی بە یانەی ڕیاڵ مەدریددەوە کردووە، لە ماوەی ئەم دوو وەرزەشدا یاریزانە بەلجیکییەکە بەهۆی زۆری پێکانەکانییەوە تەنیا بەشداری 43 یاری کردووە و پێنچ گۆڵی بۆ یانەی شاهانە تۆمار کردووە.

هەرچەندە گرێبەستەکەی هازارد تا هاوینی 2024 درێژەی هەیە، بەڵام بەهۆی پێکانە زۆرەکانییەوە بەردەوام باس لەوە دەکرێت بە ناچاری دەبێت یانەکە جێبهێڵێت، بەڵام لە نوێترین هەواڵدا سەبارەت بەو یاریزانە ڕۆژنامەی مارکای نزیک لە یانەی شاهانە ئاماژە بەوە دەکات، هازارد خۆی بە قەرزاری هاندەرانی قەڵای سپی دەزانێت و هەر لەبەر ئەوە ئارەزوو دەکات بۆ وەرزی داهاتوو لە یانەی ڕیاڵ مەدرید بمێنێتەوە و بەرزترین ئاست پێشکەش بکات.

ڕۆژنامەکە ئەوەشی خستۆتە ڕوو، سەرەڕای ئەوەی تا ئێستا هازارد لەگەڵ کارلۆ ئانچلۆتی کاری نەکردووە، بەڵام زۆر بە پەرۆشەوەیە تا ئەوەی لەگەڵ ئەو ڕاهێنەرە ئیتاڵییە مەشقەکانی دەست پێبکات.