كینیا.. مارێك لە چنگی هەڵۆیەكەوە كەوتە خوارەوە و لە نێو ئۆتۆمبێلێكدا بە ئەفسەرێكی پۆلیسەوەی دا

په‌یام

له‌ ڕوداوێكی ده‌گمه‌ندا و له‌ وڵاتی كینیا مارێك لە چنگی هەڵۆیەكەوە كەوتە خوارەوە و لە نێو ئۆتۆمبێلێكدا بە ئەفسەرێكی پۆلیسەوەی دا.

لە ناوچەی (كیتۆی) لە وڵاتی كینیا مارێك دوای ئەوەی لە ئاسمانەوە لە چنگی هەڵۆیەكەوە بەر دەبێتەوە، دەكەوێتە سەر بۆنیتی ئۆتۆمبێلێك، دواتر خۆی دەگەیەنێتە نێو ئۆتۆمبێلەكە و بە شۆفێرەكەوە دەدات.

(دەیڤد موسیوكا) كە ئەفسەرێكی پۆلیسە لەبارەی ڕووداوەكەوە دەڵێ: لەو كاتەدا ئۆتۆمبێلەكەم لێ دەخوڕی، مارەكە لە جامی سەرنشینی پێشەوە هاتە نێو ئۆتۆمبێلەكەوە، پێش ئەوەی فریا بكەوم خۆم ڕزگار بكەم بە باڵی ڕاستمیەوە دا.

بەپێی قسەی (موسیوكا)، كاتێك لە ئۆتۆمبێلەكەش دابەزیوە هێشتا مارەكە هەر بە دەستیەوە بووە، دوای ئەوەی هاواری لە خەڵكی ئەو دەوروبەرە كردووە هاتوون و مارەكەیان كوشتووە و ئەویش لەلایەن یەكێك لەو كەسانەی لە دەوروبەرە بووە، هەر بە ئۆتۆمبێلەكەی خۆی  گەیەنراوەتە نەخۆشخانە.

قوربانییەكە ئاماژە بەوە دەكات كە مارەكە لە جۆری (مامبای ڕەش) بووە كە لەدوای (كوبرا)، بە دووەم درێژترین ماری ژەهراوی لەجیهاندا دادەنرێت.

ئەوەی لە هەموو ڕووداوەكەی پێشوو سەرنجڕاكێشترە ئەوەیە كە سەرلەنوێ هەڵۆكە دابەزیوەتەوە بۆ مارەكە و لەگەڵ خۆی بردوویەتییەوە و ژەمە خۆراكەكەی لەدەست نەچووە.

هەڵبەت ئەم جۆرە ڕووداوانە زۆر دەگمەن ڕوو دەدەن، ئەگینا باوەڕپێكردنیان كەمێك زەحمەتە.