پاپا ئه‌مڕۆ له‌ عێراق چی كرد؟

په‌یام

پاپای ڤاتیكان گەیشتە عێراق و لەلایەن سەرۆكوەزیرانەوە پێشوازی لێ كرا و لەگەڵ سەرۆككۆمار و سه‌رۆكی په‌رله‌مانیش كۆبووەوە.

دوانیوەڕۆی ئەمڕۆ، پاپا فڕانسیس، پاپای ڤاتیكان بە سەردانێكی سێ ڕۆژە گەیشتە عێراق. لە دەستپێكی سەردانەكەیدا لە فڕۆكەخانەی نێودەوڵەتی بەغدا لەگەڵ مستەفا كازمی سەرۆكوەزیرانی عێراق و ژمارەیەك لە بەرپرسانی باڵا و پیاوانی ئایینی كریستیان كۆ بووەوە.

دوابەدوای كۆبوونەوەی لەگەڵ سەرۆكوەزیران، پاپا بەرەو كۆشكی سەلام، كۆشكی كۆماری بەڕێكەوت.

لە كۆشكی سەلام و لە مەڕاسیمێكی تایبەتدا، پاپا لەلایەن د. بەرهەم ئەحمەد ساڵح سەرۆككۆماری عێراقەوە پێشوازی لێ كرا.

دوای پێشوازی و مەڕاسیمەكان، ڕابەری كاسۆلیكەكانی جیهان لەگەڵ سەرۆككۆماری عێراق كۆبووەوە.

لە وتەیەكیدا، سەرۆككۆماری عێراق سوپاسی پاپای ڤاتیكانی كرد كە بەدەم بانگهێشتەكەی بۆ سەردانی عێراق هاتووە و وتیشی: عێراقییەكان شانازی بە پێكەوەژیانی ئاشتییانەی نێوان سەرجەم پێكهاتەكان دەكەن.

لای خۆیشیەوە پاپا لە وتەكەیدا لە كۆشكی كۆماری پێزانینی خۆی بۆ سەردانی عێراق وەك لانكەی شارستەنێتییەكان نیشان دا و وتی: پێكەوەژیانی برایانە پێویستی بە گفتوگۆی ڕاستەقینە و هەمەچەشنی ئایینیە كە هەزارانی ساڵە عێراقی پێ دەناسرێتەوە.

دوابەدوای كۆبوونەوەی لەگەڵ سەرۆككۆمار، پاپا فڕانسیس سەردانی كەنیسەی (نەجات)ی كرد لە بەغدای پایتەخت.

له‌ پاشتر لەگەڵ سەرۆکی ئەنجوومەنی نوێنەرانی عێراق، محەمەد حەلبوسی کۆبووەوە،

ئەمەو بڕیارە پاپای ڤاتیكان بۆ دیدار لەگەڵ عەلی سیستانی گەورە مەڕجەعی شیعەكانی عێراق سەردانی شاری نەجەف بكات.