پارێزه‌رانی سزادراوانی بادینان: مه‌ترسی له‌سه‌ر ژیانی هه‌موومان و هه‌موو ڕۆژنامه‌نووسان هه‌یه‌

په‌یام

لەسەر تۆمارە ڤیدیۆییەكەی ئەنجومەنی ئاسایش تیمی پارێزەرانی دەستگیركراوانی بادینان ڕاگەیەندراوێكیان بڵاوكردەوە جەخت لە بێ تاوانی شێروان شێروانی و هاوەڵانی دەكەنەوە.

لە كۆنگرەیەكی ڕۆژنامەنوسیدا تیمی پارێزەرانی بادینان وتیان: ئەو دەنگانەی گرتە ڤیدیۆییەكان بۆ دەستگیركراوەكان ناگەڕێتەوە و ئەو ڤیدیۆیانە هیچ بەهایەكی یاسایی نییە، هەروەها بە نایاسایی كۆمپیتەر و مۆبایلی دەستگیركراوان بەكارهێنراوە.

تیمی پارێزەرانی بادینان وتیشیان: ڕەسمگرتن لەگەڵ گەریلا بە هیچ یاسایەك تاوان نییە و ئەو كەسەش كە شاهیدی لەسەر دەستگیركراوان دەدات نێردراوی خۆیانە.

بەشدار حەسەن سەرۆكی تیمی پارێزەرانی دەستگیركراوانی هەولێر و بادینان رایگەیاند، بەپێی یاسا ناكرێت دانپێدانانی رۆژنامەنوسەكان بڵاوبكرێتەوە، چونكە لەڕوی یاساییەوە بڕیارەكە پلەی بنبڕی وەرنەگرتوە، دەبو بڕیارەكە لەدادگای تەمیز بگەڕێتەوە و پاشان بڵاوبكرێتەوە، بەڵام ئەوكاتیش نەدەبوو وێنەی دەموچاویان دیاربێت، ئەوەی دەكرێت‌ دەستوەردانە لەسەربەخۆی دادگاكان و داوا لە داواكاری گشتی دەكەین لەو بابەتە بێتەدەنگ.

ئاماژەی بەوەشكرد، "نامە چاتییەكان هیچیان راست نین، چونكە ئەو كەسانە لەدادگای دهۆك ئازادكرابون، ئەوكاتی مۆبایلەكانیان كەوتوەتە دەست هێزە ئەمنیەكان، لەگرووپ چاتەكان نامە زیادكراوە و بەشێكی زۆریان بۆ ئەو رۆژنامەنوسانە ناگەڕێتەوە".
سەرۆكی تیمی پارێزەرانی دەستگیركراوانی هەولێر و بادینان باسی لەوەشكرد، "بەشێك لە ڤیدیۆكان دروستكرابوون، بەشێكیان لەژێر هەڕەشەی جەستەیی و ناموسیان تۆماركرابوون، ئەگەر هەندێك قسەشیان كردبێت ئیعتبار ناكرێت لەروی یاساییەوە، چونكە بەئامادەبوونی پارێزەرەكانیان نەبووە".