پیرێز لە مێکاتۆی هاوینەدا چەند بۆمبێک دەتەقێنێتەوە

پەیام سپۆڕت 

فلۆرێنتینۆ پیرێزی سەرۆکی یانەی ڕیاڵ مەدریدی ئیسپانی پلانی تۆکمەی داناوە لە گواستنەوەی هاوینەدا دوو گرێبەستی گەورە یەکلای بکاتەوە.

 
ڕۆژنامەی مارکای نزیک لە یانەی شاهانە ئاشکرای دەکات، پیریزی سەرۆکی یانەی ڕیاڵ مەدرید لە هاوینی 2021دا پلانێکی تۆکمەی بۆ یەکلایکردنەوەی گرێبەستی هەریەکە لە کیلیان مباپێی فەڕەنسی و ئیرلینگ هالاندی نەرویجی داناوە.

ڕۆژنامەکە ئەوەشی خستۆتە ڕوو، بە گواستنەوەی ئەو دوو هێرشبەرە پیرێز سەرسوڕهێنەرترین مێکاتۆی یانەکەی لە 10ساڵی ڕابردوودا ئەنجام دەدات.

ڕیاڵ مەدرید لە گواستنەوەی مباپێ دووچاری ئاستەنگی زۆر دەبێتەوە، چونکە یاریزانەکە تا هاوینی 2022 گرێبەستی لەگەل یانەی پاریس سانجێرمان هەیە، یانە فەڕەنسییەکەش زۆر بە قورسی یاریزانەکانی دەفرۆشێت، بەڵام پێشبینی دەکرێت گواستنەوەی هالاند بۆ ڕیاڵ مەدرید ئاسانتر بێت، چونکە ئەو یاریزانە بۆ دۆڕتمۆند یاری دەکات و یانەکەی بە پارەیەکی خەیاڵی دەستبەرداری دەبێت.

جێی بیرهێنانەوەیە لە دوو مێرکاتۆی ڕابردوودا ڕیال مەدرید هیچ پارەیەکی لە گواستنەوەی یاریزان خەرج نەکردووە، بەڵام پارەیەکی زۆری لە نۆژەنکردنەوەی یاریگای سانتیاگۆ بێرنابیۆ خەرجکردووە.