مانچستەر یونایتد چارەنووسی ڤان دی بیکی یەکلایکردۆتەوە

پەیام سپۆڕت

یانەی مانچستەر یونایتدی ئینگلیزی چارەنووسی ڤان دی بیکی هۆڵندی و یاریزانی یانەکەی یەکلایکردۆتەوە.

 
ڤان دی بیک هاوینی ڕابردوو لە یانەی ئەیاکس ئەمستەردامی هۆڵندییەوە پەیوەندی بە یانەی مانچستەر یونایتدەوە کرد، سۆڵشایەری ڕاهێنەری شەیتانە سوورەکان تا ئێستا وەک یاریزانی سەرەکی مامەڵەی لەگەڵ ئەو یاریزانە لاوەدا نەکردووە و ئەمەش دەنگۆی ڕۆیشتنی لە یانەکە دروست کرد بوو.

لەم بارەیەوە پێگەی (espn)ی جیهانی زانیاری لە نێو یانە ئینگلیزییەکە بەدەست گەیشتووە و لە هەواڵێکی تایبەتدا ئاشکرای دەکات، بەرپرسانی شەیتانە سوورەکان پلانی نییە لەم زستانەدا دەستبەرداری ڤان دی بیک ببن و بە دڵنیاییەوە تا هاوینی داهاتوو وەڵامی هیچ گرێبەستێک سەبارەت بەو یاریزانە نادەنەوە.

سەرچاوەکە زانیاری زیاتری بڵاوکردۆتەوە و ئاماژە بەوە دەکات، سۆڵشایەری ڕاهێنەر لە قۆناغی دووەمی ئەم وەرزەدا دەرفەتی زیاتر بە ڤان دی بیک دەبەخشێت بەتایبەتی دوای ئەوەی یارییەکە تەواو چڕ دەبنەوە و بەمەش یاریزانەکە دەتوانێت تواناکانی خۆی زیاتر بسەلمێنێت.