ئیشێک بۆ کیکی سێتین دۆزراوەتەوە

پەیام سپۆڕت 

کیکی سێتین پاش دوورخستنەوەی لە ڕاهێنەرایەتی یانەی بەرشەلۆنە تا ئێستا هیچ یانەیەکی دیکە کاری نەکردۆتەوە، بەڵام لە ئێستادا یانەیەک لە خولی چینی دەیەوێت ڕاهێنەرایەتی یانەکەی بەو ڕاهێنەر بسپێرێت.

ئێوارەی ئەمڕۆ ڕافائێل بێنیتز لە ڕاهێنەرایەتی یانەی دالیانی چینی دوورخرایەوە، ئەمەش پاش ئەوەی یانەکە لە پلەی حەوتەمی کۆمەڵەی یەکەم دەهات و تەنیا خاوەنی دوو بردنەوە بوو، بەڵام حەوت شکست و پێنچ یەکسانی تۆمار کرد بوو، یانەکە ساڵانەی 12 ملیۆنی بە بێنیتز دەدا.

ڕۆژنامەی مارکای ئیسپانیش ئاشکرای دەکات، یانە چینییەکە بۆ پڕکردنەوەی شوێن ڕافا چاویان لە لێهاتووی کیکی سێتینیە و دەیانەوێت ئەرکی ڕاهێنەرایەتی یانەکەیان بەو ڕاهێنەرە بسپێرن.

کیکی سێتین لە ئێستادا چاوەڕوانی دادگا دەکات، تا ئەوەی لە ڕێگای یاساوە قەرەبووی دارایی لە یانەی بەرشەلۆنە وەربگرێت لە پای دوورخستنەوەی لەو یانە پاش شکستە قورسەکەیان بەرانبەر بایرن میونخ لە چامپیۆنسلیگی وەرزی ڕابردوو.