چوار ڕاهێنەر وەک شوێنگرەوەی لامپارد دیاری کراون

پەیام سپۆڕت

چوار ڕاهێنەر وەک شوێنگرەوەی فرانک لامپاردی ڕاهێنەری یانەی چێڵسی ناویان دەهێنرێت و یانە لەندەنییەکەش بۆ بڕیاری کۆتایی سەری لێ شێواوە.

پێگەی (espn)ی جیهانی هەواڵێکی تایبەتی بە باروودۆخی ئێستای یانەی چێڵسی بڵاوکردۆتەوە و ئاماژە بەوە دەکات، بەرپرسانی بلوز پێیانوایە پاش ئەو پارە زۆرەی لە هاوینی ڕابردوو خەرجیان کردووە کارەکان و ئەنجامەکانی لامپارد لە ئاستی پێویستیدا نەبوون و دەکرا یانەکەیە لە ئاست و ئەنجامێکی باشتر بوایە.

سەرچاوەکە باس لەوەش دەکات، کارگێڕی چێڵسی لەگەڵ ڕۆمان ئەبراهامۆڤیچی سەرۆکی یانەکە چوار ڕاهێنەریان بۆ شوێنگرتنەوەی لامپارد دیاری کردووە، ئەوانیش جویلیان ناگلیسمانی ڕاهێنەری لایبزیگی ئەڵمانی و ڕاڵف هانزهۆتڵی ڕاهێنەری ساوسهامپتۆن و ماکسیمیلیانۆ ئالێگری ڕاهێنەری پێشووی یۆڤانتۆس و تۆماس تۆخێلی ڕاهێنەری پێشووی پاریس سانجێرمانە، نزیکترین پاڵێوراویش ئالێگری ئیتاڵییە و ناوبراو زیاتر لە ساڵێکە ئامادەکاری کردووە تا ئەوەی لە داهاتوودا لە خولی نایابی ئینگلیزی کاری ڕاهێنەرایەتی بکات و بۆ ئەو مەبەستەش خۆی فێری زمانی ئینگلیزی کردووە.

ماڵپەرە جیهانییەکە ئەوەشی ئاشکرا کردووە، بەرپرسانی یانە لەندەنییەکە بۆ بڕیاری دوورخستنەوەی لامپارد بەسەردوو بۆچووندا دابەشبوون، بەشێکیان پێیانوایە دەبێت تا کۆتایی وەرز لامپارد بهێڵنەوە و لە هاویندا یەکێک لەو چوار ڕاهێنەرەی کە پاڵێوراون سەرکردایەتی پڕۆژەی یانەکە بۆ وەرزی داهاتوو بکەن، بەڵام بەشێکی دیکە پێیانوایە باشترە لەئێستادا لامپارد دوور بخرێتەوە و ئالێگری شوێنی بگرێتەوە.