کڵۆپ گەڕانەوەی بەرگریکارێکی ڕاگەیاند

پەیام سپۆڕت 

یۆرگن کڵۆپی ڕاهێنەری یانەی لیڤەرپووڵ ئامادەیی جۆیل ماتیپی بەرگریکاری یانەکەی بۆ یاریکردن نیشاندا و ڕەتیشیدەکاتەوە ڕۆبێرتۆ فیرمینۆی هێرشبەری ئاستی دابەزی بێت.

لە میانی ئەو کۆنگرە ڕۆژنامەوانییەی بۆ یاریی یانەکەی بەرانبەر بێرنلی بۆی سازکرابوو کڵۆپ وتی: ماتیپ بە باشی مەشقە کۆمەڵییەکانی ئەنجامداوە و ئێستا کاتی ئەوەیە بڕیار لە یاریکردنی بدەین.

لە درێژەی قسەکانیدا کڵۆپ ئاماژەی بەوەکرد، ئەو وەک ڕاهێنەر دەزانێت لە تۆپی پێدا تەنیا ئەنجام گرنگە، بەڵام ئاستی بەرزیش پێش ئەنجام پێویستە، ئێمەش لە دواین یاریدا بەرانبەر مانچستەر یونایتد ئاستێکی بەرزمان نیشاندا.

لە بەشێکی دیکەی قسەکانیدا کڵۆپ بەرگری لە فیرمینۆی هیرشبەری یانەکەی کرد و وتی: ڕاستە لە چەند یاری ڕابردوودا فیرمینۆ گۆڵی زۆری تۆمار نەکردووە، بەڵام ئەمە بە واتایی ئەوە نایەت کە ئاستی دابەزی بێت.
لە کۆتاییدا یۆرگن ئەوەی ئاشکرا کرد، دیۆگۆ جۆتا تا ئێستا لە پێکانەکەی چاک نەبۆتەوە و پێویستی بەچەند هەفتەیەکی دیکە هەیە.