15/01/2021
1039 جار خوێنراوەتەوە
كەشناسی: بەهۆی ئەو پێشبینییانەی بۆ باران دەكرێت لەماوەی داهاتوودا، مەترسی وشكەساڵی دەڕەوێتەوە
پهیام
كەشناسی هەرێمی كوردستان پێی وایە بەهۆی ئەو پێشبینییانەی بۆ باران دەكرێت لەماوەی داهاتوودا، مەترسی وشكەساڵی دەڕەوێتەوە.
لە میانی لێدوانێكی ڕۆژنامەوانییدا، فازڵ ئیبڕاهیم، بەڕێوەبەری گشتیی فەرمانگەی كەشناسیی هەرێمی كوردستان ڕایگەیاند: لەمساڵدا دواكەوتنی باران بووەتە هۆكارێك بۆ بوونی ترس و دڵەڕاوكێی دروستبوونی وشكەساڵی، بەتایبەتی لای جووتیارەكان، بەڵام بەگوێرەی پێشبینییەكان، لە ڕۆژی پێنجشەممەوە هەرێم كەوتووەتەوە ژێر كاریگەی نزمە پاڵاپەستۆكانی دەریای ناوەڕاست، ئەوەش هۆكارێكە بۆ بارینی باران و سەرەتایەكی دڵخۆشكەریش دەبێت.
هەر لەبارەی وشكەساڵییشەوە، فازڵ ئیبڕاهیم لەگەڵ ئەوەی ئاماژەی بەوە دا كە هەر چەندە مانگێك لە وەرزی زستان تێپەڕ بووە و باران دوا كەوتووە، بەڵام بەپێی قسەی ئەو "ئەو ڕێژە بارانەی باریوە و ئەو پێشبینیانەی بۆ داهاتوو هەن، بەتایبەت لەو پانزە ڕۆژەی كۆتایی ئەم مانگە، پێشبینی دەكرێت سێ شەپۆلی باران ناوچەكانی هەرێم بگرێتەوە و ئەو ترس و دڵەڕاوكێیەی هەیە و باس دەكرێن، لاواز بێت.
بەڕێوەبەری فەرمانگەی كەشناسی هەرێم زانیاری ئەوەیشی دا كە لە پارێزگای سلێمانی پەڵەی داوە و زەوی بەكەڵكی كێڵان دێت، بەڵام لە هەولێر و دهۆك بڕی پێویستی باران بۆ پەڵە نەباریوە.
لە تۆڕە کۆمەڵایەتیەکان شەیری بکە