11/12/2020
493 جار خوێنراوەتەوە
له چه‌ندین ناوچه‌ی هه‌رێم خۆپیشاندان به‌ڕێوه‌چوو و گرژی و ئاڵۆزی لێكه‌وته‌وه
په‌یام
لە سلێمانی و هەڵەبجە و ئیدارەكانی گەرمیان و ڕاپەڕین خۆپیشاندان بەڕێوەچوو، لە چەندین ناوچەش گرژی و توندوتیژی دروست بوو.
پاش ئەوەی دوێنێ لە سلێمانی بانگەشە كرا بۆ خۆپیشاندان لە بەردەم ئەنجومەنی پارێزگای سلێمانی، لە شەوی رابردووەوە هێزێكی گەورە لە ناو شاری سلێمانی بڵاوەیان پێكراوە، ئەمڕۆش لە كاتژمێر یەك و نیو خۆپیشاندان بە شێوەیەكی بەرفراوان دەستی پێكرد، كە خۆپیشاندەران لە مووچە خۆران و جەماوەری ناڕازی شاری سلێمانی پێكهاتبوون.
لە بەرانبەردا هێزە ئەمنییەكانیش هەوڵیاندا بە گوللەی پلاستیكی و گازی فرمێسك رێژ رێگری بكەن لە بەڕێوە چوونی خۆپیشاندان، بەو هۆیەوە گرژی دروست بوو و دەیان كەس لە خۆپیشاندەران بەهۆی غازی فرمێسك رێژ تووشی تەنگەنەفەسی بوون.
لە كەلاریش بە هەمان شێوە خۆپیشاندانێكی بەرفراوان بەڕێوە چوو، هێزە ئەمنییەكان پەلاماری خۆپیشاندەرانیاندا و بە زەبری هێز و گازی فرمێسك رێژ بڵاوەیان پێكردن، هەروەها لە رانیەش بە هەمان شێوە هێزە ئەمنییەكان رووبەڕووی خۆپیشاندانەران بوونەوە رێگریان كرد خۆپیشاندانی ئاشتیانە بكەن.
ماوەی هەفتەیەكە لە هەرێمی كوردستان ناڕەزایەتی بەرفراوان سەری هەڵداوە و تا ئێستا نزیكەی 10 خۆپیشاندەر كوژراون و هەروەها بەدەیانی دیكەش بریندار بوون، هەروەها هەڵمەتێكی بەرفراوانی دەستگیر كردن بەڕێوە دەچێت و سەدان كەس دەستگیر كراون كە هەندێك لە دەستگیر كراوان لە زۆنگی پارتیدان.
لە تۆڕە کۆمەڵایەتیەکان شەیری بکە