01/12/2020
334 جار خوێنراوەتەوە
كهركوك.. سەرجەم کەمپەکانی ئاوارەکان داخران
پهیام
وەزیری کۆچ و کۆچبەرانی عێراق، ئیڤان فایق رایگەیاند کە دوای گەڕانەوەی دوا کاروانی ئاوارەکان لە کەمپی لەیلان لە پارێزگای کەرکووک بۆ زێدی خۆیان، سەرجەم کەمپەکانی ئاوارەکان لەو پارێزگایە داخراون.
وەزارەتی کۆچ و کۆچبەرانی عێراق لە راگەیەنراوێکدا ئاماژەی بەوەداوە، ئیڤان فایق باسی لەوە کردووە کە وەزارەتی کۆچ و کۆچبەران بە ھەماھەنگی لەگەڵ دیوانی پارێزگای کەرکووک و دەزگای ئاسایشی نیشتمانیی و رێکخراوە نێودەوڵەتییەکان، کەمپی لەیلان-ی لە پارێزگای کەرکووک داخستووە، ئەوەیش دوای ئەوەی دوا کاروانی ئاوارەکان کە ژمارەیان ١٨٠ خێزان بوون و لە کەمپی لەیلان نیشتەجێبوون، گەڕانەوە زێدی خۆیان.
لە راگەیەنراوێکدا ھاتووە "لەئێستادا ھیچ ئاوارەیەک لە پارێزگای کەرکووک نەماوە و سەرجەم کەمپەکان لەو پارێزگایە داخراون".
بەھۆی ھێرش و پەلامارەکانی داعش بۆسەر بەشێک لە ناوچەکانی عێراق لە ھاوینی ٢٠١٤دا و ئۆپەراسیۆنی کۆنتڕۆڵکردنەوەی ئەو ناوچانەی کە رێکخراوەکە دەستی بەسەرداگرتبوو، نزیکەی پێنج ملیۆن و ٥٠٠ ھەزار عێراقی ئاوارەبوون کە بەشێکیان وەک پەنابەر روویان لە وڵاتانی دراوسێ و وڵاتانی ئەورووپا کردووە.
لە تۆڕە کۆمەڵایەتیەکان شەیری بکە