کڵۆپ: هیچ گرفتێکم لەگەڵ ڤیناڵدۆم نییە

پەیام سپۆڕت - بڕیار تەها

یۆرگن کڵۆپی ڕاهێنەری یانەی لیڤەرپووڵی ئینگلیزی ستایشی تواناکانی جۆرجینۆ ڤیناڵدۆنی هۆڵندی و یاریزانی هێڵی ناوەندی یانەکەی دەکات.

 گرێبەستی ڤیناڵدۆم هاوینی داهاتوو لەگەڵ لیڤەرپووڵ کۆتایی دێت و تا ئێستا سەبارەت بە نوێکردنەوەی گرێبەستی نێوانیان نەگەیشتوونەتە ڕێککەوتن، لە مێرکاتۆی هاوینەی ڕابردووشەوە یانەی بەرشەلۆنە بە گرنگییەوە هەوڵی گواستنەوەی ئەو ئەستێرە هۆڵندییە دەدات.

لەبارەی ڤیناڵدۆمەوە لە نوێترین دیداریدا کڵۆپ بۆ دەیلی مەیل لێدوانی داوە و دەڵێت: دڵخۆشم بەوەی ڤیناڵدۆم لە یانەکەماندا بەباشی یاری دەکات و لە زۆرێک لە یارییەکاندا ئامادەیی هەیە.

لە بەشێکی دیکەی قسەکانیدا راهێنەرەکەی ڕیدز ئاماژەی بە لێهاتووی یاریزانە هۆڵندییەکە کرد و یاریکردنی یاریزانەکەی لە چەند شوێنێکی یاریگادا بە شتێکی زۆر گرنگ لە قەڵەمدا.

لە درێژەی قسەکانیدا کڵۆپ وتی: ڤیناڵدۆم یەکێکە لە باشترین کەسەکان کە ناسیومە و یەکێکیشە لە باشترین ئەو یاریزانانەی ڕاهێنەرایەتیم کردووە، هیچ گرفتێکم لەگەڵیدا نەبووە.

لە کۆتایدا ڕاهێنەرەکەی لیڤەرپووڵ ئەوەی خستە ڕوو، ئەوان وەک پیشەگەر مامەڵە دەکەن و لە ماوەی ئەم دوو ساڵەدا لەگەڵ ڤیناڵدۆم چەندین نازناوی گرنگیان بردۆتەوە و هیچ گۆڕانکارییەکە بەسەر پەیوەندییەکەیاندا نەهاتووە، دڵنیاشن لەوەی تا کۆتا ڕۆژی گرێبەستەکەی جۆرجینۆ هەموو تواناکانی بەکاردەهێنێت.