قەبارەی بازرگانی سێكسی لە هەرێمی كوردستان لە سەر تۆڕی ئینتەرنێت چەندە؟

په‌یام

سێكس یەكێكە لە 5 بەهێزترین سێكتەری بازرگانی لە سەرانسەری جیهان، لەگەڵ پێشكەوتنە بەردەوامەكانی تەكنەلۆژیا، سێكسی ئەلیكترۆنییش زیادبوو كە خۆی دەبینێتەوە لە قسەكردن و نوسین و پەیوەندی دەنگ و رەنگ (ڤیدیۆ).

پێش ئەوەی بێمە سەر كرۆكی بابەتەكەم، دەمەوێت ئاماژە بەوە بكەم كە ژمارەی دانیشتوانی عێراق نزیك دەبێتەوە لە 40 ملیۆن كەس و لەو ژمارەیەش نزیكەی 48.6% واتە نزیكەی 19.8 ملیۆن كەس ئینتەرنێت بەكاردەهێنیت، بە نسبەت هەرێمی كوردستانیشەوە نزیكەی 3.6 ملیۆن كەس بەكارهێنەری ئینتەرنێتن.

بە پێی زۆربەی ئامارە جیهانیەكان، ووڵاتی عێراق (بەهەرێمی كوردستانیشەوە) لە پێشەنگی ووڵاتانی عەرەبی و ڕۆژهەڵاتی ناوەراستە لە سەیركردن و بینەری ڤیدیۆی سێكسی.

لە ماوەی چەند ساڵی ڕابردوودا سێكسی ئەلیكترۆنی بە شێوەیەكی بەرچاو هەڵكشا، بە تایبەتی لەو ووڵات و ناوچانەی كە درەنگ ئاشنابوون بە تەكنەلۆژیای تازە.

سێكسی ئەلیكترۆنی چیە؟

سێكسی ئەلیكترۆنی بریتیە لە خۆبەتاڵكردنەوە یان خۆخاڵیكرنەوە لە حەز و ئارەزووەكان لەگەڵ ڕەگەزی بەرامبەر چ بە شێوەی نوسین (نامە-چات)، بە شێوەی دەنگ ( ئەپڵیكەیشنەكانی پەیوەندی كردن) یاخود بە شێوەی دەنگ و ڕەنگ (ڤیدیۆكۆڵ).

ماوەی چەند ساڵێكە سێكسی ئەلیكترۆنی لە هەرێمی كوردستان بڵاوبۆتەوە و بەو هۆیەشەوە دەیان ملیۆن دۆلار رەوانەی دەرەوەی كوردستان كراوە بە تایبەتی بۆ ئەو باندانەی ئەو جۆرە كارانە دەكەن و بە تایبەتیتریش لە هەردوو ووڵاتی مەغریب و جەزائیر.

بەپێی ڕاپۆرتێكی كەناڵی ئاسمانی ڕووداو، لە قەزای (.....) و تەنها لە ماوەی یەك هەفتەدا، 11 كەس تووشی ئەو باندانە بونە و پارەیان بۆ رەوانە كردون.

سەرەتای ئەو پەیوەندیە سێكسیە لەو كاتە سەرهەڵدەدات كە لە ئەژماری كچێكی نەناسراوە نامەیەكت پێدەگات و ئیتر هەنگاو بە هەنگاو و قسە بە قسە، تا ئەگاتە ئەو قۆناغەی كەسی بە ئامانج كراو لەبەردەم كامێرادا خۆی رووت دەكاتەوە و دوای ئەوەش ڤیدیۆكەی لەلایەن ئەو باندەوە تۆمار دەكرێت.

كێشەكە لێرەوە دەستپدەكات، كە دوای تەواوبوونی ئەو جۆرە سێكسە، هەڕەشەی بڵاوكردنەوەی ڤیدیۆكە دەكەن، بۆیە دەبێت بە ناچاری پارەیان بۆ رەوانە بكرێت.

لە ماوەی ڕابردوودا بەدەیان كەس لە پلە و پۆستە جیاوازەكانەوە ڤیدیۆكانیان لێ بڵاوكرایەوە و لەبەرامبەریشدا بە هەزاران كەس و بە بێدەنگی و لە پێناو پاراستنی كه‌سایه‌تی خۆیان پارەیان ناردوە.

لە ئێستادا 2 گرفتی نوێ سەری هەڵداوە، یەكەمینیان ئەوەیە كە ئەو باندە لەگەڵ خەڵكی كورد دەستیان تێكەڵ كردووه‌، ئەمەش بۆ ئەوەی هاوكاریان بن بۆ قسە كردن لەگەڵ ئەو خەڵكانەی كە زمانی عەرەبی نازانن، گرفتی دوەمیش ئەوەیە كە باندی كوردی لە هەرێمی كوردستان ئەو جۆرە كارانە دەكەن.

بۆ ئامادەكردن و لێكۆڵینەوەی زیاتر لەسەر ئەم بابەتە، هەفتەی ڕابردوو سەردانی چەند بانكێكم كرد هیچیان ئامادە نەبوون بە بێ دۆكیۆمێنتی پێویست پارە بۆ (مەغریب، جەزائیر، لوبنان) رەوانە بكەن و ووتیان داوامان لێكراوە كە پارە بۆ ئەو ووڵاتانە رەوانە نەكەین، لە هەمان كاتدا لە نێو بازاری دۆلار چەند نوسینگەیەكم كرد، سەرەڕای ئەوەی بە چاوێكی زۆر سەیر تەماشایان دەكردم (ههههه) بەڵام ئامادە نەبوون پارەكە رەوانە بكەن.

دوو بنەمای سەرەكی هەیە بۆ ئەو ئەو جۆرە لادان و هەڵەكردنانە، یەكەمیان نەبوونی هۆشیاری تەكنەلۆژی (كە نازانم كێ بەو كارە هەڵبستێت و خەڵك ئاگاداربكاتەوە لەو جۆرە مەترسیانە)، دووەمینیان ئەو بێ كەسییەی لە سۆشیال میدیا و راگەیاندنی كوردی هەیە كە وایان لە خەڵك كردوە هەموو شتێكیان لا ئاسایی بێت، پر بینەرترین و زۆرترین خوێنەری بابەتەكان یان باسی سێكسە، یان ڤیدیۆی نیمچە ڕووت وسێكسییە.

پوختەی بابەتەكە.. خەڵكیكی زۆر كە تووشی ئەم دیاردەیە دەبێت بە ناچاری هانا بۆ كۆمپانیاكانی تەكنەلۆژی دەبات بۆ سڕینەوە (رەشكردنەوە)ی ئەو ڤیدیۆ سێكسییەی كە تۆماركراوە، لە راستیدا كۆمپانیا یان گرووپ یان ئەو كەسە ڤیدیۆكە دەسڕێتەوە لەسەر تۆڕی ئینتەرنێت، بەڵام چەند كەیسێك هەبووە لە رابردوودا كە هەر ئەو كۆمپانیا، كەس، گرووپ و شارەزای ئای تی ـە ڤیدیۆ سێكسیەكەی لای خۆی هەڵگرتووە و لە كاتی تردا و بە ناوی تر هەڕەشەی لە خاوەنەكەی كردووە و پارەی لێ وەرگرتووه‌.

هیچ داتایەكی وورد نیە كە بزانین چەند كەس تووشی ئەم كێشەیە بووە و چەند ملیۆن دۆلار رەوانەی دەرەوەی كوردستان كراوە، بەڵام ئەوەی كە هەیە ئەوەیە ڕۆژانەی بە نزیكەی 72 كەس تووشی ئەو باندە سێكسیانە دەبن و كەمترین پارەی رەوانەكراویش 1000 دۆلاری ئەمریكیە..

زۆری تر هەیە بۆ ووتن، بە 10 بابەتی تریش تەواو نابێت، هیوادارم هەموو لایەك دووربن لەو كێشە و گرفتانە..

ئەندام عومەر
ماستەر لە ئەندازیاری كۆمپیوتەر - بەڕێوەبەری كۆمپانیای تێك ئای بۆ تەكنەلۆژیای زانیاری