گەورەترین فڕاكسیۆنی ئۆپۆزسیۆن لە پەرلەمانی كورستان سه‌ردانی تۆڕی میدیایی كۆمه‌ڵی كرد

په‌یام

بەمەبەستی پێشكەشكردنی دەستخۆشی لە بەرامبەر ئەو ئەركە میدیاییەی پێی هەڵدەستن، فڕاكسیۆنی كۆمەڵی ئیسلامی لە پەرلەمانی كوردستان سەردانی تۆڕی میدیایی كۆمەڵی كرد.

وەفدی فڕاكسیۆنی كۆمەڵ كە لە سەرۆك و ئەندامانی فراكسیۆن پێكهاتبوو، لەلایەن فاروق عەلی بەڕێوەبەر و ژمارەیەك لە ئەندامانی ئەنجومەنی بەڕێوەبردنی تۆڕی میدیایی كۆمەڵ پێشوازی كران.

لەو دیدارەدا، فڕاكسیۆنی كۆمەڵ سوپاسی تۆڕی میدیایی كۆمەڵیان كرد، كە توانیویەتی ڕۆڵێكی گرنگ لە ڕووماڵی هەواڵ و ڕووداوەكانی پەیوەست بە پەرلەمانی كوردستان ببینێت.

لەو ڕووەشەوە، سەرۆك و ئەندامانی فڕاكسیۆنی كۆمەڵ جەختیان كردەوە، تۆڕی میدیایی كۆمەڵ لە میانی ئەركی میدیایی خۆیدا، بایەخی تەواوی بە ڕووداوەكانی ناو پەرلەمانی كورستان داوە و، هاوڵاتیانی لە وردەكاریی ئەو ڕووداوانە و، هەڵوێستی فڕاكسیۆنی كۆمەڵ و ڕۆڵی پەرلەمانتارانی كۆمەڵ لە پەرلەمان ئاگادار كردووە، كە ئەمەش جێی ستایشی فڕاكسیۆنە.

لە بەرامبەردا، بەڕێوەبەری تۆڕی میدیایی كۆمەڵ، سوپاسی ئەو سەردان و ستایشەی كرد، دووپاتیشی كردەوە، تۆڕی میدیایی كۆمەڵ بە ئەركی خۆی زانیوە، ڕای گشتیی هەرێمی كورستان و سەرجەم هاوڵاتیانی كورد زوبان لە كار و چالاكییەكانی پەرلەمانی كوردستان ئاگادار بكات، هاوكات تیشكیشی خستووەتە سەر هەر كەمتەرخەمییەك كە دەرهەق بە مافه‌كانی هاوڵاتیان كرابێت، ئەگەر ئەو كەمتەرخەمییە لە پەرلەمانیشەوە بووبێت.

هەمان كات پێداگریی كرد، تۆڕی میدیایی كۆمەڵ، بەردەوام دەبێت لەسەر گەیاندنی پەیامی چاكسازی و دژەگەندەڵی و، هۆشیاركردنەوەی هاوڵاتیان لە هەر ستەمێك كە بەرانبەریان بكرێت. كە ئەمەش پایەیەكی گرنگە لە سیاسەتی كۆمەڵی ئیسلامی و، كارنامەی فڕاكسیۆنەكەی، وەك گەورەترین فراكسیۆنی ئۆپۆزسیۆن لە پەرلەمانی كورستان.