كۆترێكی مێینه‌ به‌ بڕی ملیۆنێك و 900 هه‌زار دۆلار فرۆشرا

كۆترێكی مێینه‌ له‌ زیادكردنێكی ئاشكرادا و به‌ بڕی یه‌ك ملیۆن و 600 هه‌زار یۆرۆ، كه‌ ده‌كاته‌ ملیۆنێك و 900 هه‌زار دۆلار، فرۆشرا.

له‌ ڕاگه‌یه‌ندراوێكیدا له‌وباره‌وه‌، خانه‌ی (پیگۆن پارادی) ئه‌لیكترۆنی كه‌ به‌ (پیپا) ناسراوه‌، ئاشكرای كرد "كۆتكره‌كه‌ نامه‌به‌ره‌، له‌لایه‌ن هاووڵاتییه‌كی چینیه‌وه‌ كڕدراوه‌ و به‌رهه‌می یه‌كێك له‌ كێڵگه‌ به‌ناوبانگه‌كانی ناوچه‌ی (ئه‌نتۆیرپ)ی باكووری به‌لجیكایه‌".

به‌پێی زانیارییه‌كان، كۆتره‌كه‌ ناوی (نیو كیم)ـه‌، ته‌مه‌نی دوو ساڵه‌ و له‌ڕووی نرخه‌وه‌ به‌سه‌ر كۆترێكی دیكه‌ی نێره‌ی ناوچه‌ی (فلانده‌ر)ی هه‌مان وڵات كه‌ ساڵی ڕابردوو به‌ ملیۆنێك و 481 هه‌زار دۆلار به‌ هه‌مان هاووڵاتی چینی فرۆشرا، پێش كه‌وت.

لای‌ خۆیه‌وه‌، (نیكۆڵاس گیسلبریچ) دامه‌زرێنه‌ر و به‌ڕێوه‌به‌ری خانه‌ی (پیپا) ڕایگه‌یاند: ئه‌و نرخه‌ی كۆتری (نیو كیم)ی پێ فرۆشراوه‌ له‌سه‌ر ئاستی جیهانی نرخێكی پێوانه‌ییه‌ و نه‌بیستراوه‌ كۆترێك به‌و نرخه‌ فرۆشرابێت.

ئه‌مه‌و تائێستا شوناسی كڕیاری كۆتره‌كه‌ ئاشكرا نه‌كراوه‌، به‌ڵام ده‌وترێت به‌وپێیه‌ی ساڵی ڕابردوو كۆتره‌ نێرینه‌كه‌ی كڕیوه‌، به‌ مه‌به‌ستی زاوزێ ئه‌مساڵیش مێینه‌یه‌كی بۆ كڕیوه‌.