بەڕێوەبەرانی پەروەرده‌ی سلێمانی داوا له‌ به‌ڕێوه‌به‌ران و مامۆستایان ده‌كه‌ن بچنه‌وه‌ ناوه‌نده‌كانی خوێندن

په‌یام

به‌ڕێوه‌به‌رانی په‌روه‌رده‌ی سلێمانی داواكارییه‌ك ئاڕاسته‌ی به‌ڕێوه‌به‌ران و مامۆستایانی شاره‌كه‌ ده‌كه‌ن و داوایان لێ ده‌كه‌ن بچنه‌وه‌ ناوه‌نده‌كانی خوێندن.

له‌ ڕوونكردنه‌وه‌یه‌كدا كه‌ ئاڕاسته‌ی به‌ڕێوه‌به‌ری سه‌رجه‌م ناوه‌نده‌كانی خوێندن له‌ سلێمانی كراوه‌، هه‌ریه‌ك له‌ عومه‌ر ساڵح ئه‌حمد و به‌كر محه‌مه‌د مه‌حمود به‌رێوه‌به‌رانی په‌روه‌رده‌كانی سلێمانی ڕایده‌گه‌یه‌نن، "ئێمە وەک پەروەردەکاران و بەرپرسانی پەروەردەیی پێمان وایە کاتی ئەوە هاتووە بچینەوە ناوەندەکانی خوێندن و دەوام دەستپێبکەینەوە و بەگوێرەی فەرمانە وەزریەکان کە پۆلەکانی 1 و 2ی بنەڕەتی و پۆلی 12ی ئامادەیی بە هەموو بەشەکانیەوە لەناو خوێندنگە دەوام دەکەن و پۆلەکانی تریش بە شێوازی خوێندنی ئەلکترۆنی دەبێت".

هه‌ر له‌ ڕوونكردنه‌وه‌كه‌دا هاتووه‌، "داواکارین لەسەرجەم بەڕێوەبەر و مامۆستایانی بەڕێز بچنەوە ناوەندەکانی خوێندن و دەوام دەست پێبکەنەوە".

ده‌قی ڕوونكردنه‌وه‌كه‌:

بۆ / بەڕێوەبەرە بەڕێزەکانی سەرجەم ناوەندەکانی خوێندن

بابەت/ ڕوونکردنەوە

وەک ئاگادارن ماوەی چەند ڕۆژێکە دەوامی فەرمی خوێندنگەکان بە گوێرەی قۆناغەکان دەستیپێکردووە، بەڵام لە سنووری هەردوو پەروەردەی ڕۆژهەڵات و ڕۆژئاوای سلێمانی بەهۆی دواکەوتنی مووچە و خراپی گوزەرانی مامۆستایان و فەرمانبەران دەوام بە پێی پێویست نەکراوەتەوە.

ئێمە وەک پەروەردەکاران و بەرپرسانی پەروەردەیی پێمان وایە کاتی ئەوە هاتووە بچینەوە ناوەندەکانی خوێندن و دەوام دەستپێبکەینەوە و بەگوێرەی فەرمانە وەزریەکان کە پۆلەکانی 1 و 2ی بنەڕەتی و پۆلی 12ی ئامادەیی بە هەموو بەشەکانیەوە لەناو خوێندنگە دەوام دەکەن و پۆلەکانی تریش بە شێوازی خوێندنی ئەلکترۆنی دەبێت.

بەڕێزان.. چارەنووسی خوێندن بەم شێوەیە لە بەرژەوەندی قوتابی وخوێندکار نابێت، دەزانین هەریەکەمان چەند لە دواکەوتنی مووچە و بێدادی نیگەرانین و لەگەڵ گشت مافە ڕەواکانی مامۆستایانین هێندەیش نیگەرانی پڕۆسەکەین بۆیە بەم ڕوونکردنەوەیە داواکارین لەسەرجەم بەڕێوەبەر و مامۆستایانی بەڕێز بچنەوە ناوەندەکانی خوێندن و دەوام دەست پێبکەنەوە.

بۆ ئاگاداری بەڕێزتان ڕۆژەکانی دەوامی ساڵی خوێندن و وادەی تاقیکردنەوەکان و تەواوکردنی پڕۆگرامەکانی خوێندن دیاریکراون وچیتر با(کات) بەهەدەر نەڕوات.

عومه‌ر ساڵح ئه‌حمد - به‌كر محه‌مه‌د مه‌حمود

بەڕێوەبەرانی پەروەردە

17/10/2020